Zaldibarrek berea egingo du Eitzagako errotako armarria

Zaldibarko Udalak orain arte erabili duen armarria alde batera utzi eta “Eitzagako errotan egon den Zaldua leinuaren armarria” herriko armarri gisa hartzea erabaki du. Gainera, herriaren izena gaur egun erabiltzen dena mantendu eta Zaldua izen historikoa alde zaharra aipatzeko erabiliko da.

Zaldibarko Udalak arbola bat eta parean zaldi bat erakusten duen irudia erabili du armarri edo ezaugarri gisa azken hamarkadan. Hala ere, Zaldibarrek, ez zuen armarri propiorik Bizkaiko elizate gehienetan bezala.

Hala adostu zuen, aho-batez, txostena landu zuen batzordeak. Lantalde horretako partaideak Arantza Baigorri, Zaldibarko alkatea; Balendin Lasuen, Zaldibarko alkate ohia eta Gerediaga Elkarteko ohorezko lehendakaria; Gaizka Zabarte zinegotzi ohia eta Jose Mari Uriarte eta Jon Irazabal, Gerediaga elkarteko kideak izan ziren.

Hiru otso

Lantalde horrek, ikur berria aukeratzerako orduan, “herrian, tradizioz, historikoki dagoen zeozer hartzea” proposatu zuen. Baldintza hori kontuan hartuta “Eitzagako errotan egon den Zaldua leinuaren armarria” proposatu zuten taldekideek Zaldibar elizateko armarri gisa.
Aukeratutako armarriak hiru otso ibiltari beitatuak erakusten ditu. Irudi horri beste elementu bat gehitzea proposatu zuten batzordekideek, armarriari ‘Zaldua’ hitza gehitzera adostu zutelako.

Jatorrizko armarria, gaur egun, ez dago Eitzagako eraikuntzan kokatuta, Errotako ugazabak Markinan duen jauregian baizik. Armarriaren kopia bat eskuratzeko beharrezkoa ikusi zen “Murga familiarekin hitz egin beharra”, txostenean adierazten denez.

Zaldibar edo Zaldua

1932. urtera arte Zaldua bazen herriaren izena, urte horretan ofizialki aldatu zen herriaren deitura. Txostenean azaltzen denez “aurrerako garaietan Zaldua izena zeukan herriak baina trenbidea egin zenean hemengo geltokiari Zaldibar izena” jarri zioten.

Garai haietan, bainuetxea zegoela eta, oso garrantzitsua zen deitura eta “horren ondorioz herri honetara etortzen zirenak Zaldibar hasi zioten deitzen. Gainera, Balnearioari “Balneario de Zaldibar y Zaldua’ izena jarri zioten eta honek lagundu egin zuen” gaur egun duen izena errotzen.

Hori dela eta, batzordeko kideek ez dute beharrezkoa ikusi izen aldaketa,“izen guztiek eboluzioa baitaukate eta Zaldibarrekin horrela gertatu da”.  Hala ere, Zaldua izena mantentzearen alde azaldu dira “alde zaharrari buruz”, hau da, “herriko goiko aldeaz hitz egiten denean”.