Andra Mari eta San Roke jaiak ospatuko dituzte Arrazolan bihar hasita

Atxondoko Arrazola elizateko Andra Mari eta San Roke jaiak, atarikoa izan zuten joan zen igandean briska eta mus txapelketen lehen kanporaketekin eta jubilatuen bazkariekin. Prestatutako ospakizun nagusiak  hala ere, bihar hasi eta astelehenera arte jarraituko dute eta egitarauan ez dira faltako ohiko antzerki agerraldia, bertsolariak edo erromeriak.

Arratsaldeko 20.30an hasiko dituzte ospakizunak txopoa sartuz eta gaueko 22.15ean piztuko duten txupinazoaren ondoren ‘Andrak eta gizonak eta aldrebes’ antzezlanaren emanaldia hasiko da. Luhartz taldearen erromeriarekin eta berakatz zopa eta txokolatea dastatzearekin amaituko dira eguneko ospakizunak.

Andra Mari egunerako prestatutako egitaraua 11.30ean emango den mezarekin hasiko da eta ostean herriko dantzarien saioa eta porra txapelketa izango dira. Arratsaldeko 18.30ean pelota partiduak hasiko dira eta jarraian triki-bertso-pintxo-kantu gauaren txanda izango da, Unai Iturriaga, Igor Elortza eta Angel Mari Peñagarikano bertsolarien partaidetzarekin. Eguneko ekitaldiak txarri harrapaketarekin amaituko dira.

San Roke eguneko ospakizunak baselizaren inguruan burutuko dira eta goizeko 11.30ean emango den mezaren ostean piper dastatzea, igel txapelketa eta oilasko-paella txapelketa egongo dira. Bakotxak bere maletiaz egindako bazkariaren ostean, Iurretako Partiliko elkartea, Garaiko Zabaleta anaiak eta Mallabiko Aitor Aldapa partaide izango dituen asto probak hasiko dira. Gauean dj baten ekitaldia egongo da Makatzeta jatetxean.

San Roke txiki eguna ospatuko dute astelehenean eta arratsaldeko 18. 30ean Poxpolo eta Konpainia pailazoen ekitaldia egongo da. Iluntzean herri afaria egongo da, honen ostean Hoba Neuke taldearekin erromeria hasiko da eta aurtengo ospakizunei amaiera emateko berakatz zopa eta txokolatea banatuko dira bertaratutakoen artean.