Lau obra estreinatuko dira Silboberrik antolatutako XXI. txistu kontzertuan

Durangoko Silboberri txistu elkarteak antolatuko txistu kontzertuak XXI. edizioa burutuko du bihar eta, aurten ere, orain arte entzun gabeko piezak tartekatuko ditu egitarauan. Landako Gunean arratsaldeko zortzietan hasiko den agerraldian, abeslariak eta dantzari garaikideak zein tradizionalak izango dira txistulariekin batera.

Kontzerturako prestatutako egitarauan “txistu errepertorioko pieza klasikoak, moldaketa modernoagoak eta, aldez aurretik txistuarekin zer ikusi gutxi duten musika-estiloetako obrak tartekatuko ditugu”, antolatzaileen esanetan. Azken finean “gure helburua txistuak bestelako estiloak jotzeko eta musika-elkarteekin agertzeko duen moldakortasuna erakustea da”, Silboberriko kideek diotenez.

Era askotariko obrekin osatutako egitarauan lau estreinaldi azpimarratzen dituzte Silboberrikoek. Lehena, Jon Etxeandiak txistua, metalak, perkusioa, gitarra eta abesbatzarentzat konposatutako ‘Lore bat tontor gainean’; bigarrena txistu bandarentzat Jabier Ituartek sortutako ‘Itxasmina’ eta hirugarrena Joaquín Á. Lecumberrik txistu, metalak, perkusioa, abesbatza eta dantzarietzat egindako ‘Gipuzkoatik itzulia’.

Iragarritako laugarren estreinaldia J. Luis Blascok D. Ferrakis eta F. Perren ‘I will survive’ piezan oinarritu eta txistu, metalak, baxua, perkusioa, abesbatza eta dantzarientzat egindako moldaketa izango da.

170 partaide

Beste bi obren moldaketa ere iragartzen da egitarauan. Bata, Jagoba Astiazaranek L. Andersonen obran oinarritutako ‘Idazmakina’ eta bestea Jabier Ituartek Kalakaren ‘Sagarra jo’ abiapuntu duen pieza. Eguneko programa estilo desberdineko beste bost piezekin osatuko da.

Agerraldian 170 partaide inguru bilduko da eta guztien zuzendaria Jabier Ituarte Aulestia izango da. Lanadako erakustazokako eszenatokian Euskal Herriko herri eta hiri desberdinetatik gerturatutako 90 txistulari egongo dira eta beraiekin batera Portu Brass taldea, Barakaldo perkusio joleak, baxu jolea eta saxofoi joleak ere izango dira. Agerraldiko partaidetza Oñatiko Ganbara abesbatza eta Oinatz dantza taldearekin eta Durangoko L’Atelier dantza eta antzerki eskolako kideekin osatuko da.