Aziza Brahimek Saharako doinuak gerturatuko ditu bihar Elorrioko Lariz jauregira

Elorrioko Musikaire jaialdiak azken aurreko asteburuari ekingo dio ostiralean Aziza Brahim abeslari sahararrak Lariz jauregian eskainiko duen agerraldiarekin. Hurrengo egunean Xabi Aburruzagak hartuko dio txanda toki berean eta igandean dantza garaikidean oinarritutako hiru pieza labur izango dira ikusgai Herriko plazan.

Aziza Brahimek herri sahararraren doinu tradizionalak basamortuko bluesarekin, poesiarekin eta borroka politikoarekin uztartzen ditu, nahiz eta bera Tindufeko (Aljeriako) errefuxiatuen esparruetan jaio zen. Abeslaria izateaz gain, poeta eta artista ere bada eta bere ahots iradokitzaile eta zoragarrian oinarrituta Sahelgo doinuetan zein Espainia, Kuba, Mali edo Europatik etorritako beste soinu batzuetan murgiltzen da.

Brahimek argitaratutako azken lanean bizitzari, maitasunari eta herri sahararrari buruz abesten du eta 2014an Munduko Musiken Disko Onena izendatu zuten.

Estilo propioa

Trikitiaren doinuak nagusituko dira hurrengo egunean eszenatoki berdinean Xabi Aburruzagak emango duen kontzertuan. Musikari bizkaitarrak ibilbide luzea du musika munduan eta eskusoinua eta pianoa jotzen hasi bazen, trikitiaren aldeko apustua egin zuen, tradizioa eta modernitatea elkartuta.

Aburruzagak estilo propioa garatu nahi du, betiere nondik datorren ahaztu gabe eta bere konposizioetan trikitiaren soinu tradizionalak jazz, blues edo folk erritmoekin uztartzen dira. Iaz, izen handiko Runas proiektuaren lehiaketa (Festival de Ortigueira) irabazi zuen.

Lehenego bi kontzertuak gaueko 22.30ean hasiko badira, igandean Herriko plazan egongo den dantza garaikide agerraldia arratsaldeko 19.00etan hasiko da. Bertan bi taldek eskainitako hiru pieza taularatuko dira.

Kukai eta Lasala

Jon Mayak zuzentzen duen Kukai dantza konpainiak emango dio hasiera eta amaiera ekitaldiari ‘Sorbatza’ eta ‘Gelajauziak’ koreografiaren zenbait pasarterekin. Lehenengoa oreka berrezarri nahi duten lau gizonezkoen arteko errituala da eta Cesc Gelabert koreografoak sortutako bigarrenak Gipuzkoako soinu-zaharrak eta Lapurdiko dantza-jauziak hartzen ditu oinarri.

Lasala konpainiak eskainiko duen ‘Lauesku’ piezak berriz, zalantzan jartzen du arau eta ohiturei men egitea eta aurrez emandako soluzio eta erantzunak zalantzan jartzeko aldarrikapena egiten du.