Mikel Urdangarin eta Seiren taldearen azken lanak, Durangoko Azokan entzungai

Bor-borrean dago Durangoko Azoka. Bi egun oraindik eta egitarau estua aurretik. Aurkezpenek eta zuzenezko emanaldiek aurrera jarraitzen dute Durangoko erakustoki erraldoian. Mikel Urdangarinek eta Seiren taldeak azken lanak aurketzuko dute gaur.

Seiren taldea zuzenean izango da Ahotsenean, “Udazkena” azken lana aurkezteko. Disko “landuagoa eta lasaitasunez hartu duguna”. Zornotzarren emanaldia eguerdiko 14.30etatik aurrera burutuko da. Ondoren, Ramon Saizarbitoriak “Martutene” liburua aurkeztuko du bertan, arratsaldeko 17.00etan.

Azokako aurpegi ezaguna den Toti Martinez de Lezea idazleak, “Mareas” eta “Urak dakarrena” Ttartalorekin argitaratu dituen liburuen berri emango du 11.30ean, Areto Nagusian.

Leku berdinean baina ordu erdi beranduago, Miren Amuriza bertsolari berriztarrak, Gotzon Barandiaran, Jasone Osoro, Mireia Delgado, Josu Martinez, Uxue Alberdi, Pako Aristi eta Juankar Lopez Mugaertzarekin “Titiriteroen ipuinak” aurkeztuko dute.

“Azula eta ez urdina”

Arratsaldean, berriz, Kirmen Uribek “Mussche” liburua aurkeztuko du 16.00etan eta ordu erdi beranduago Mikel Urdangarin  abeslariak azken lana plazaratuko du.  “Azula” hiru musikariekin batera grabatu duen diskoa da, soinu soilagoa eta garbiagoa lortuz. “Azula eta ez urdina”, bere etxean hala esan delako beti.

Umeen guneak, Saguganbarak,  ijitoen kulturarekin bat egingo du gaur. Emakume ijitoen ipuin kontaketa eta tailerrak izango dira, besteak beste. 

Irudienean, berriz, Bideografik ekoizpenak “Psicoblock” (David Maeztu) eta “Aizkora hotsak goi mendietan” (Eukeni Arriortua) emanaldia eskainiko du, 16.00etan.  Kabi@a gunean teknologia libreen tailer irekia ospatuko den bitartean, Szenatokian, antzerki maratoia izango da egun guztian zehar.

DURANGON. Durangoko Azoka