Inoiz baino parte hartzaile gehiago izan ditu aurten literatur lehiaketak

Iurretako VII. Literatur lehiaketaren irabazleak bihar ezagutuko dira, eguerdian sari banaketa egingo da Ibarretxe kultur etxean. Inoiz baino parte hartzaile gehiago izan ditu aurten, 282 hain zuzen. Lehiaketa bi sailetan banatuta egon da, ipuinak eta bertso-paperak. Eta ikasleei zein helduei zuzendutakoa izan da.

VII. Literatur Lehiaketaren sari banaketa bihar, 13:45etan egingo da Ibarretxe kultur gunean. Aurten inoiz baino jende gehiagok parte hartu du sariketan, 282 pertsonek. Haurren sailean 108 ikaslek aurkeztu dituzte euren lanak, gazteen sailean 160 parte hartzaile izan dira eta helduetan 14.

Sarituen artean 2.260 euro banatuko dituzte: txikienentzat liburu sortak egongo dira, gazteei liburu bonoak emango zaizkie eta helduek berriz, dirutan jasoko dute saria.

Haur, gazte eta helduen artean irakurzaletasuna bultzatzea da, hain zuzen ere, lehiaketa honen helburua. Horretarako herriko eskolen laguntza ezinbestekoa dela argitu dute Udaletik, eta baita herriko elkarteen laguntza ere.

Aurtengo edizioan Iurretan bizi den Iraia Okina ilustratzaileak parte hartu du. Liburuxka, kartelak, diplomak eta libretatxoak berak egindako irudiez osatu dira.