Iurretak 2027ra arte indarrean egongo den euskararen erabilera normalizatzeko plana jarri du abian

Datozen urteetan Iurretako Udalaren hizkuntza politika aurrera eramango duen Euskararen Erabilera Normalizatzeko Plana abian jarri da eta indarrean egongo da 2027ra bitartean.

Udal langileekin batera diseinatuko egitasmoa joan den abenduan onartu zen eta bere bi erronka nagusiak “euskararen kudeaketa Udal arlo guztietan integratzea eta Udalaren hizkuntza politika betetzea, arreta berezia jarriz herritarren arretan, Udal eskaintzan eta lan hizkuntzan”, gobernu taldeak adierazi duenez.

Plan honen bidez, Iurretako Udaleko euskararen egoera zehaztu da eta egoera hori hobetzeko beharrezko ekintzak ezarri dira. Alde batetik, herritarren hizkuntza-eskubideak bermatu nahi dira, eta bestalde, erakundearen eremu guztietan euskararen erabilera areagotzeko sustapen-ekintzak abian jartzea aurreikusten da.

Udalak parte-hartzaile guztien adostasuna, inplikazioa eta lankidetza zaindu eta bilatu du, langileen parte-hartzea bultzatuz eta euskararen erabilera sustatzeko konpromiso indibidualak eta kolektiboak har ditzaten.

Iurretako alkate Oskar Kokak azaldu duenez, “33 urte igaro dira Udalak bere lehen erabilera plana garatu zuenetik, eta denbora honetan aurrerapen asko egin dira euskararen erabileran, baina oraindik asko dago hobetzeko hizkuntza ofizialen kudeaketa bikainean. Hori dela eta, 2027. urtera arte indarrean egongo den plan bat onartu da, eta, horretarako, udal-langileen lankidetza eta inplikazioa ditugu”.