Terapia

Gaur egungo egoerak larritasuna eta urduritasuna sortzen digu behin baino gehiagotan; lan gehiegi dugula, ez dugula lanik, krisia dela, ez dela. Gutxi asko danok eta gehienok bizi gara arineketan edo etsita.

Kontsumo gizarteak erosi-erabili-bota gurpil zoroan sartu gaitu eta hortxe dihardugu txoriburuak lez jira eta buelta. Baina, zelan urten zurrunbilo horretatik? Zelan konpondu gure buruko jaleoa? Bideak egon badaude. Bakoitzak bilatu eta aurkitu behar berea.

Gaur egungo nire terapia, eguneko tentsioa askatzeko terapiarik eraginkorrenetarikoa, dantza egitea da.

Ez naiz dantzari ona eta, ez dut uste sekula izango naizenik be, baina, dantza maisu bikain bati esker dantza egiteak dakartzan zenbait alderdi on aurkitu ditut:

• Dantzaren bidez norbere burua hobeto ezagutzen ikas daiteke.
• Taldean dantza egiteak lagun berriak egitea dakar, dantza-lagunak hain zuzen. Harreman sare berri bat. Sare naturala eta adin ezberdinetako pertsonez osotua.
• Gorputzarentzat zein buruarentzat lagungarri gertatzen da. Gimnasioan gustukoak ez diren ariketak egiten egon beharrean, gorputzaren lanketa ariketa atseginen bidez egiteko aukera eskaintzen du dantzatzeak.
• Dantza bakoitzaren nondik norakoak ezagutzeko modua ahalbideratzen du.
• Dantza ostean zurito bat hartzea.
• Hilean behin erromeriara joan eta zuzeneko musikaz dantzatzea. Horrela gaztetu egiten gara. Lehengo egunak gogoan. Lehengo akorduak buruan.
• Karnabaletan berriz, tostadak, torrijak, txokolatea, mozorroak…

Mirari horren artifizeak Sabin Bikandi du izena. Beragatik ez balitz ez nukeen inoiz dantzan ikasiko, ez nukeen inoiz dantzan gozatuko, ez nukeen inoiz dantza egitearen plazerra zer den ezagutuko.

Askotan irakurri eta aipatu dugu irakasle onak bere ikasleak ikastera bultzatzen dituela eta batez ere egiten edo ikasten ari direnaz disfrutatzen irakasten diela. Horixe da Sabin Bikandiren trebetasuna. Musikari handia izateaz gain, dantza maisu paregabea da, gainera dantzaren inguruan hainbat ekintza antolatzeko ardura eta lana be hartzen du bere bizkar.

Esate baterako pasa den urteko aratusteetan jaialdi itzela antolatu zuen Plateruenean, eta orduko arrakasta ikusirik aurten berriro animatu da. Ondorengo lerroetan Aiko taldearen izenean luzatu duen deialdia:

“TORRIJALDIA, TXOKOLATADA, MOZORRO DANTZA…
Iñauteriak, ihauteak, aratusteak, karnabalak… danak parrandan gau eta egun, eta gero… 40 egunez garizuma isil eta luzea… Ba gu geuk, garizuma laburtzeko asmoz, otsailaren 24an, domeka, Durangoko Plateruenean, arratsaldeko 18:00etan, mozorro dantza, txokolatada eta II Tostada/Torrija Dastaketa Mundiala egiteko asmoa dugu. Etxetik tostada eta torrijak ekarri, mozorroa, dantzan egiteko gogoa, eta berton txokolate gonbitea eta erromeria aurkituko dugu”

Oraindik terapia hori probatu ez baduzu, domekan duzu aukera. Sarrera doakoa da eta lagunarte atsegina ziurtatua duzu. Ez utzi hurrengorako. Erdu eta disfrutatu.

Animatzeko iazko Torrijaldiaren irudiak ikusgai hemen:

Marisa Barrena psikopedagogoa da