Plastikozko poltsa bako eguna

Uztailaren 3an Plastikozko Poltsa Bako Nazioarteko eguna (International Plastic Bag-Free Day) izaten da. Aurten 4. aldiz ospatu da egun hau mundu mailan, baina egia esan, ez dakit gurean oraingoz oihartzun handirik izan duen aldarrikapen honek.

Nire iritziz epe laburrean plastikoa gure ohituretan hainbestean errotu da, ezen ez baita erraza bera barik bizitzea. Ahalegindu arren, gaitza da plastikozko zorro barik gure dendetatik irtetea. Supermerkatuen zerbait ordaindu behar bada ere, denda txiki zein baserritarren merkatuan, lantzean behin, nahiz eta plastikorik ez jartzeko esan ez digute jaramonik egiten.

Halere, Plastic Bag Free Day mugimenduaren webguneak luzatzen dizkigun datuei erreparatuz gero, berandu baino lehen, plastikozko zorroen erabilera mugatzera jo beharko genukeelakoan nago, bai gure ondorengo belaunaldiei zor diegun errespetuagatik bai utziko diegun munduaz izan beharko genukeen arduragatik.

Aipatutako Plastic Bag Free Day mugimenduaren webgunean honela azaltzen zaizkigu plastikozko zorroak dakartzan kalteak:

– Zorro bakoitza 25 bat minutuz baino ez da erabiltzen, goia jota.

– Desegiteko, ostera, 100dik 500 urtera behar ditu (plastiko motaren arabera).

– Munduan milioi bat plastikozko poltsa erabiltzen da minutuko. – Europako biztanle bakoitzak, urtean 500 bat plastikozko zorro erabiltzen ditugu. – Munduan urtean 3,4 milioi tona plastiko-zorro ekoizten dira.

Datuok zer pentsa ematen digute baina, nola aldatu gure ohiturak? Hona hemen plastikozko zorroez zein plastikozko bestelakoez http://elplasticomata.com/ webgunean aurkitu ditudan zenbait aholku:

1. Agur plastikozko zorroei. Geure poltsak erosketak egitera goazenean.

2. Agur botilako urari. Iturriko ura edan (jarri filtro bat norbere etxekoari gura izanez gero).Kanpora goazean eraman berriro betetzeko botila.

3. Ez edan plastikozko botilako freskagarririk.

4. Ekidin plastikozko enbaseak: ahal izanez gero erosi soltean (granelera)

5. Ez erabili plastikorik janaria gordetzeko edo berotzeko.

6. Ez erabili plastikozko biberoirik ez jostailurik.

7. Ekidin latako janaria. Metalezko latek bisfenol deritzon babes kaltegarria izaten dute askotan.

8. Esan agur erabili eta bota motako; bizarra-mozteko aitzurrei, metxeroei, platerei, edalontziei zein mahai tresnei.

Nago, aholkuok jarraituta gure plastiko lorratza murriztea ez dela hain zaila, zelanbait esatearren geure esku dago plastikoaren erabilera murriztea, plastiko barik bizitzea ordea, erronka izan daiteke. Dena den egon badaude horrela bizi diren gizandreak, esate baterako Beth Terry-ren ???My Plastic Free Life??? bloga edota haren ???Plastic Free??? liburua lagungarri gerta dakizkiguke beste esperientzia batzuk ezagutzeko.

Marisa Barrena psikopedagogoa da