Iñaki Perurenaren kazetaritza lezioak

Interneti eta sare sozialei zerbait eskertzera nator zutabe honetan. E-mail masiboei, sare sozialei eta ahoz-ahoko komunikazioari esker gure burua kazetaritzat dugunok albiste ezin hobea izan dugu: sentsazionalismo merkea astindu du Iñaki Perurenak!

Ze demontre ematen zaio telebista ikusleari? Horixe izan da sarri, sarriegi, nire buruari egin diodan galdera. Begibistakoa da gaur egungo telebistan aurrekontu txikiarekin egiten diren produktu asko dagoela. Baina aurrekontu murritzarekin bi produktu eman daitezke: kalitatezkoak ala kalitate gabekoak. Kalitatezko produktuak egiteko, nire aburuz, baldintza bi eman behar dira: gogoa izatea eta profesional trebeak izatea.

Profesional trebea izateak esan gura du trebea den pertsona batek zerbaitetan prestakuntza egokia jaso duela. Demagun ni neu zirku batera noala lan egitera. Zirkuan pailazoaren sudurra eta arropak jantzi eta ugazabak jendaurrera ateratzen nauela lehenengo egunean, trebakuntzarik gabe eta gidoirik gabe. Noski, jendeak barre franko egingo du, baina ez da nik eragin gura nukeen barrea izango.

Antzeko zerbait gertatu zaio Manu Redondo telebistako aurkezleari. Durangaldean sobera ezaguna da pertsonaia. Tokian-tokiko TDT bitartez ikusten den telebista kate batean saio aurkezle omen dabil (“Manu a manu” saioan), eta horietako batean Iñaki Perurenari elkarrizketa egitea otu zitzaion. Elkarrizketa martxoan egin bazen ere zuzeu.com interneteko atarian jarri zuen kazetari batek eta joan zen asteartetik aurrera sare sozialean ibili da bueltaka (http://zuzeu.com/2010/11/09/inaki-perurenari-euskalduna-ez-dela-esaten-zaionean/). Elkarrizketa ederra da, ez elkarrizketariak duen trebeziagatik, baizik eta elkarrizketatuak kazetariei (guztiei, kazetariei eta sasi-kazetariei) ematen digun lezioagatik.

Kazetaritza lezioak

Manu Redondok, irribarrea ahoan, zenbait galdera egiten dizkio Perurenari, denak edo ia denak katxondeo antzean. Perurenak, ordea, serio hartzen ditu kazetariak mahai gainean jartzen dituen gaiak. Redondo Perurena “ziztatzen” saiatzen da, morrozko euskalduna jokoan sartuko delakoan. Perurenarentzat, ordea, eztabaidatzen diren gaiak oso serioak dira eta ez da Redondoren jokoan erortzen. Aldiz, lezio ederrak ematen dizkio elkarrizketariari.

Interneti eta sare sozialei eskertu nahi izan diet 170.000 mila pertsonak baino gehiagok bideoa ikusi izana. Izan ere, askori ahoa berotzen zaio kazetariak kritikatzen dituenean, eta bideoak balio du, hain zuzen, kazetari batek egin behar ez duena edo kazetaritza ez dena agerian uzteko. Gure burua kazetaritzat dugunok gogoan izango ditugu unibertsitate garaiko dozena erdi lezio. Horietako bat aipatuko dut nik, gaiarekin zerikusia duena eta alboan kazetaritza ikasle bat banu aipatuko niokeena: ”jakin behar duzu elkarrizketak ondo prestatu behar direla, baina ez duzunez denborarik izango, tentuz joan eta zentzuz jokatu; osterantzean, elkarrizketatua haserraraziko duzu, barregarri utziko zaitu eta elkarrizketa gabe itzuliko zara”.  

Egia da ere telebista kate horretako agintariak pozik egongo direla. Redondok Perurenari egin zion elkarrizketak eta Perurenak Redondori eman zizkion lezioak, interneten zintzilikatu zen egun horretan behintzat, ETB 1eko Gaur Egunek baino ikusle gehiago izan baitzuen. Helburua bete zuten, baina zirkuko biribilean eman duten jendaurreko irudia beste kontu bat da. 

Julen Orbegozo kazetaria da