Desioak

Elkarri zorionak emoten amaitu dugu joan den urtea, berdintsu hasi oraingoa.  Zein zorion mota ordea? Urtearen azken egunean emakume bat hil zuen bere bikotekideak eta 2017ko lehen egunean bi erailketa matxistaren berri izan dugu.

Askotan esan dugu nazkatuta gaudela. Nazkatuta jarraitzen dugu, baina ez dugu etsiko, ez dugu amore emango. Jakin badakigu antolaketa patriarkalaren botere egitura ez dela erraz desagertuko; soldata ezberdintasunak, kristalezko sabaiak, mikromatxismoak, genero terrorismoa, interneteko eraso matxistak eta beste asko jasan beharko ditugu aurrerantzean ere.

Halere, Urte Berri honetarako hainbat oinarrizko desio ditugu feministok. Hona hemen Maria Castejón historialariak aipatzen dituen, eta neure egiten ditudan zenbaitzuk:

1. Desioa. Bizi egin nahi dugu. Ez gaitzatela hil. Ez gaitzala inork bortxatu. Ez gaitezela beldurrez ibili kalean, bakarrik zein lagunekin goazenean. Ez gaitezela errudun sentitu erasoak jasaten ditugunean.
2. Desioa. Hedabideek erantzukizunez eta konpromesuz eman dezatela indarkeria matxisten berri. Izan be, emakumeak ez dira hiltzen, hil edo asesinatu egiten dituzte. Ez zaizkigu hiltzaileen bizitza eta mirariak axola. Sensibilizazioa, heziketa eta prebentzioa interesatzen zaizkigu.
3. Desioa. Hedabideetan emakumeen ahotsa entzun dadila. Esateko baterako, ETB edota Euskadi Irratiko tertulietan eta mahai inguruetan.
4. Desioa. Politikari eta herri arduradunek benetako politika integralak martxan jar ditzatela, aurrekontuak murriztu barik. Ez da nahikoa konzentrazioetan azaltzea. Herri arduradunen benetako inplikazioa eta konpromisoa nahi dugu.
5. Desioa. Soldata ezberdintasunak desager daitezela. Emakumeok lanpostuetarako aukera berdintsunak nahi ditugu, kristalezko sabai barik.
6. Desioa. Testu liburuetan, literaturan, publizitatean, zinean…emakume aintzidariak, borrokalariak, boteretsuak eta dibertigarriak aurkitu nahi ditugu. Emakumeek ez dezatela ikustezin izaten jarraitu.
7. Desioa. Geure buruarentzat denbora izatea. Etxeko lanaren eta ume zein nagusien zaintzaren ardura guztia geure bizkar ez izatea. Aske izan eta sentitzea. Dibertitu, ondo pasau, barre egin eta borrokan jarraitzeko indarra izatea.

Iraultza feminista izango da, ala ez da izango. Urte Berri on

Marisa Barrena psikopedagogoa da