Astola aldizkariaren seigarren zenbakia argitaratu du Gerediaga Elkarteak

Gerediaga Elkarteak Astola aldizkariaren seigarren alea kaleratu du. Durangaldeko historian barrena sakontzeko 11 lan berri proposatzen ditu argitalpenak.  Lanen artean aipagarria da “Durango” izeneko automobilaren ibilbide laburra, edo Joseba Sarrionandiaren “Moroak gara behelaino artean? “ saiakera liburuan agertzen den Pedro Hilarion Sarrionandiari buruzko lana, besteak beste.

Eskualdeko bizitzako arlo ezberdinei buruz egin diren lanen eta artikuluan zabaltzaile izateko asmoa du Astola aldizkariak. Baina, ikerketa lanen pizgarri izatea ere bada urtekariaren helburua.

Seigarren zenbaki honek hamaika lan nagusi eskaintzen ditu. Juan A. Hernandezen “Durango Detroit?” artikuluak, Durangon automobilen fabrika bat eraikitzeko lehen pausuak eman zirela joan den mendeko erdialdean inguruko lana proposatzen du.
Mohamed Tah Tah-en eskutik, berriz, “Garaitik Marokora eta itzulera” bidaia ezagutzeko aukera izango da, eta “Anarkistak II. Errepublikan” lanari esker, J.A Orobio-Urrutiak, sindikatuen mugimenduak 30eko hamarkadan izan zuen hasiera Durangon kontatzen du.

Bestalde, Nerea Mujikak, Gerediagako presidenteak, “Eskualde baten mila aurpegi” lanaren bitartez gogoeta bat egiten du. Alberto Santanak, berriz,  Durangaldeko baserrien errepasoa egiten du “Baserrien urrezko aroa” deritzon lanean.

“Zornotzako Borroka”

Seigarren aldizkarian beste gai batzuk ere jorratzen dira: “Durango Bizkaiko lurra” Iñaki García Caminoren eskutik; Gaizka Zabarteren  “Zaldibarko ekialde urruna”; “Kanposantuetako arkitekturaren” inguruan Barrio Lozak idatzi du, eta Jose Luis Arruabarrena “Elorrioko Plazaren” inguruan aritu da.

Azkenik “Zornotzako Borroka” artikulua ere argitaratu du Astolak. Ia ez da historiako liburuetan aipatu ere egiten, baina Amorebieta, Etxano eta Iurretako mugetan Napoleonen tropa frantsesek espainiarrak gailendu zituzten.

Gerediaga Elkarteak sustatzen duen ikerketa eta historia aldizkaria eskuragai izango da datozen egunetan ohiko dendetan, eta abenduaren 6tik 9ra,  Durangoko Euskal Liburu eta Disko Azokan. 168 orrialdeko aldizkariak iazko prezio berdina izango du: bost euro. Gerediaga Elkarteko bazkideek, gainera, 2013. urteko egutegiarekin batera doan eskuratu ahal izango dute.

DURANGON. Durangoko albisteak