Zaldibarko Udalak eskolako jolastokia eraldatzeko ekarpenak egiteko deia egin die herritarrei

Zaldibarko Udalak eskolako jolastokiaren eraldaketa proiektuan ekarpenak egiteko formularioa betetzera animatu ditu herritarrak.

Zaldibarko guraso eta hezkuntza komunitatea hainbat urte daramatza “jolastokiaren eraldaketan lanean”. Proiektu pedagogiko parte-hartzaile eta sakon bat landu zenetik, ‘Amesten dugun jolastokia’ taldea proiektu hori bultzatzen aritu da.

Ikastetxeko jolas garaietan erabilitako espazioak “jolasteko eremuak izateaz gain harremantzeko ere badirela” adierazi dute Udal arduradunek. Izan ere, “harreman hauek, espazioaren konfigurazioari eta ondorioz, erabilerari, estuki lotuak daude”.

“Jolastokiek duten konfigurazioa oso garrantzitsua da haurren harremanak sustatu eta eraikitzeko orduan, bai genero berdintasuna bai adin ezberdinetako haurren erlazioa eta orokorrean elkarbizitza lantzeari begira”, Udaletik adierazi dutenez.

Eskolan egin nahi den eraldaketa egiteko Zaldibarko Udala “adituak eta arituak diren ELE arkitektura estudioarekin harremanetan jarri eta proiektua lantzen hasi da”. Abenduaren 18an, eskolan bertan, lehen ideia proiektua aurkeztu zioten herritarrei, eta bertan, proposamena ezagutzeko eta ekarpenak egiteko aukera izan zuten herritarrek.

Jolastokiaren eraldaketak “maila batean edo bestean herritar guztioi eragiten digu” eta hori kontuan hartuta, “lehen ideia honen gaineko ekarpenak jaso nahi dira” prestatutako galdetegiaren bidez.

“Gobernu Taldearentzat eskolako jolastokiaren eraberritzea proiektu estrategiko bat da, Zaldibarko umeen hezkuntzan oso garrantzitsua delako”, azaldu du Eneritz Azpitarte Zaldibarko alkateak.