Udalarekin adostutako hitzarmena osoko bilkuran onartu zela dio DHK-k

Durangoko Herri Komunikabideak, DHK, Anboto astekaria argitaratzen duen elkartea, Durangoko Udalarekin adostutako hitzarmenaren inguruan azaldu da. “Udaleko talde guztiekin berba egin eta landu genuen, osoko bilkuratik pasatu zen, eta gehiengoz onartu zen EAJ, PSE-EE eta Aralarren aldeko botoekin”, DHK-k gogoratu duenez.

Durangoko Udalak EAJko kide batena den In Mediobai enpresari alkate andreak sinaturiko dekretuz 28.000 euro eman izana salatu du Aralarreko Dani Maeztu zinegotziak aste honetan. Prentsa ohar baten bidez erantzun du EAJk, esanez Aralar taldeak 2009ko udal aurrekontuak onartzearen truke Durangoko Herri Komunikabideari urteko 40.000 euroko hitzarmena onartzea eskatu zuela, “eta Maeztuk enpresa horrekin harreman zuzena eta pertsonala duela” aipatuz.

Honen harira, Durangoko Herri Komunikabideko zuzendaritzakideek eta langileek sinatutako komunikatu batean “garbi eta ozen esan gura dugunez”, beste hainbat talde eta elkartek Durangoko Udalarekin hitzarmenak sinatu dituzten modu berean eta DHK-k Durangaldeko beste udal batzuekin sinatu ohi duen modu berean, gauzatu da.

Aurrekontuak aurrera ateratzeko

Bestalde, argitu nahi izan dute Dani Maeztu, Aralar taldeko zinegotziak, DHK-rekin daukan harreman bakarra, “Anboto astekarian bost asterik behin idazten duen iritzi zutabea dela, EAJko Aitziber Irigorasek, PPko Juan José Gastañazatorrek, Bilduko Urdaspal Bolinagak eta PSE-EEko Idoia Agorriak daukaten berbera”.

Azkenez, nahiz eta pozik agertu Euskara Biziberritzeko Plan Nagusiari jarraiki EAJrentzat euren proiektua garrantzitsua zela sinestuta, “orain, aldiz, minez jakin berri dugu aurrekontuak aurrera ateratzeko ezinbestean babestu izan gaituela urteotan”, gaitzetsi dute.

DURANGON. Durangoko albisteak