Bla, bla, bla…

Maiatza da urteko sasoi ederrena. Eguraldi onarekin batera, ikasturtea amaitzeko egun gutxi falta direla gogoratzen digun  hilabetea da.  Umeen jaunartzeak ospatzeko aukeratutakoa eta sinismena dutenentzat ama birjinaren aldeko mezetara joateko sasoia.  Baina aurtengo maiatza ederrenetakoa dugu, lau urterik behin ospatzen diren hauteskunde madarikatuak amaitu direlako.

Egia esan zelako bakea! Gure herriko politikariak hamabost egunetan zehar ibili dira buru belarri herritarren botoen bila. Han hemenka aritu dira, mitinak, pentsaurrekoak, batzarrak antolatzen, goxokiak, boligrafoak, poxpoloak  eta globoak banatzen, larrosak eskaintzen…Denek nahi izan dute hain preziatuak eta balio handiko botoak eskuratzea. Batzuk lortuko zuten eta beste batzuek, berriz, ez.

Alderdi bakoitzak bere kanturik politarenarekin liluratzea nahi izan du. Batzuek doinu indartsuak eta  melodikoak erabili dituzte eta beste batzuek, berriz, lau urterik behin entzun ondoren, ahaztea ezinezkoa  zaizkigunak. Txikleak bezala pegatuta  eta norbera konturatu barik, aproposak ez diren tokietan abesten hasten diren kantuak. Mota honetako doinuak  horretarako sortuak dira eta horretaz asko dakite irudia eta komunikazioa lantzen dituzten  enpresak. Kanpaina amaitu da eta hainbeste aldiz entzun diren kantu horiek gorde beharko dituzte alderdietako egoitzaren egurrezko armairuan eta ondo gorde,  hemendik lau urte barru berriro ere atera behar direlako. Alderdi batzuen kantuak  hainbeste entzun dira zakarrontzira bota beharko dituztela.

Ez dakit zein izango den emaitza baina bake santua!. Ez dizuet gezurrik esango. Bakea  iritsiko da oporrak hartzen dituztenean. Bien bitartean, alderdietako buruzagiek datuen eta emaitzen interpretazioak egingo dituzte eta kontu berberarekin beteko dira egunkarietako orrialde guztiak. Hori bai, bakoitzak bere argudioak emango ditu.  Hauteskundeetan irabazlea suertatuko dena pozik azalduko da eta galdu duenaren aurpegian tristezia nabarituko zaio. Bakoitzak bere gustoko arrazoiak emango dizkigu eta berriro ere, bla, bla, bla… Eskerrak lau urterik behin ospatzen direla!
 
Herrietako udaletxeak osatzen hasiko dira eta horretaratako ere, berba egin beharko dute. Batzuentzat orekatua izan daitekeena besteentzat ez da izango eta hor ere, ados jartzeko denbora luzea eramango dute. Udaletxea osatu ondoren, udaletxeko batzordeen konposaketaz arituko beharko dira eta gai honetan ere, denek ados jartzeko, ene ama! Ah, batzordeak osatu ondoren , denok lasai jo gaitezke oporretara! Aurten merezitako oporraldia gainera, eh? Ospa dezagun halere gure sasoi ederrena dela eta udal eta foru hauteskundeetako kanpaina amaitu dela!

Idoia Azkorbebeitia kazetaria da