Landakotik haratago hedatuko da Durangoko Azoka

Durangoko Azokak izango dituen zortzi guneak inoiz baino haratago helduko dira aurten. Nobedadeen artena aipgarraia da Irudienea espazioa Zugaza zinema aretoan kokatuko dela. Ahotseneak, berriz, trenbidea zeharkatu eta Montevideo kalean kokatuko du karpa. Beraz, euskal kulturaren gunetik eta disziplina ezberdinetatik ibilbidea proposatzen die bisitariei Gerediaga Elkarteak.

Areto Nagusia, Ahotsenea, Irudienea, Kabi@, Saguganbara, Plateruena eta Szenatokia guneek programazio zabala antolatu dute, eta hauei Azoka TV espazioa ere gaineratu behar zaie.

Gerediaga Elkarteak kulturaren plaza den Azoka Durango osora hedatu nahi du, eta bisitarientzako ibilbidea proposatzen du. Izan ere, aurtengo Azoka inoiz baino hedatuagoa izango da. Landakotik San Agustin Guneraino zabalduko da, Zugaza zinema aretotik pasata. “700 metroko tartea dago guztien artean, eta oinez 5 minutu inguru batetik bestera”, azaldu du Nerea Mujikak, Gerediagako lehendakariak gaur goizean egin duen nobedade nagusien aurkezpenean.  Prentsaurrekoan Arrate Illaro, Irudienea guneko arduraduna eta Oihane Barrutia Saguganbarako arduraduna izan dira.

Nobedadeen artean, Irudienea ikus-entzunezko plazaren kokapena da. Aurten Landako Gunetik Zugaza aretora pasatuko da. Aretoak 100 ikusleentzako lekua du, eta azokatik 150 metrora dago. “Emanaldiek kalitatean irabaziko dute, eta sortzaile eta ikusleek hartu-emanean aritzeko aukera izango dute, emanaldiak, tertuliak, eta mahai-inguruak antolatu direlako”, azaldu du Illarok. Adibidez, Jon Garaño eta Jose Mari Goenaga (80 egunean) zinemagileak egongo dira ‘Loreak Errepidean’ filmaren aurrerapena egiteko; Goenkaleren movie bat aurre-estreinatuko da, aktoreen parte-hartzearekin. Egitarauaren barruan, adibidez, ‘Amaren Eskuak’ eta ‘Emak Bakia’ filmak emango dituzte, besteak beste.

Ahotsenea, trenbidea zeharkatuz

Ahotseneak, sortzaileen plazak, berriz, lekuz aldatuko den bigarren gunea da. Landako erakustazokaren eta Montevideo kalearen artean kokatuta izango da karpa, trenbidea zeharkatuta. 40 emanaldi inguru eskainiko dira eta beste hainbeste liburu aurkezpen egingo dira. Oholtzatik pasatuko direnen artean EH Sukarra, Kirmen Uribe, Mikel Urdangarin eta Alex Sardui izango dira, besteak beste.

Areto Nagusian batez ere liburuak aurkeztuko dira, eta mahai-inguru, hitzaldi eta prentsaurrekoentzako lekua ere izango da.

Berbaro Elkarteak Saguganbara, txiki eta handien plaza koordinatuko du, eta Landako elkartegian izango da. Plateruenena, ordea, kontzertuen gunea bilakatuko da. Bertatik Ruper Ordorika, Su ta Gar edota Urtz taldeak izango dira bertan.

Kabi@, kultura digitalaren plazan, teknologia proiektuak aurkezteko gunea da. Azkenik, Szenatokian, arte eszenikoen gunea San Agustin Kultur Gunean izango da eta antzerki maratoia egingo dute, besteak beste.

DURANGON. Durangoko albisteak