Izurtza eta Mañariko Udalak haserre dira “asteetan” arlo sozialeko langilerik gabe daudelako

Izurtza eta Mañariko Udalak beraien haserrea adierazi diote Durangoko Mankomunitateko Amankomunazgoaren arduradunei, azken asteetan “dagokigun arlo sozialeko langilerik gabe geratu garelako”.

Lore Muñoz eta Ainara Otxotorena, Izurtza eta Mañariko alkateak hurrenez hurren, idatzitako kexa-idatzian adierazten dutenez asteak daramatzate arlo sozialeko langilearekin “kontaktuan jarri nahian”. Azkenean, behargina “bajan dagoela” eta bere lanpostua “momentuz ordezkatuko ez dela” jakin dute.

Herri bietako agintariek ez dute “Mankomunitatetik azalpenik jaso” eta nahiz eta “herri txikiak garela” kontziente diren, izaera hori “ez da arrazoia bi herri oso gizarte laguntza zerbitzurik gabe uztea”. Gainera, une honetan, gizarte langilearen premia are garrantzitsuagoa dela uste dute, “Covid-ak sortutako izurritea dela eta inoiz baino gehiago” beharrezkoago delako “zerbitzu guztiak asebeteta egotea”.

“Astelehenean hasiko da”

Mireia Elkoroiribe Durangoko Mankomunitateko Amankomunazgoaren presidenteak adierazi duenez, “arlo sozialeko langile berria astelehenean hasiko da lanean”. Gainera, Izurtza eta Mañariako Udaleko alkateek bidalitako kexaren aurrean, “ez genuen inolako berririk jaso beraien egonezinari buruz”, esan du.

“Ordezkapena betetzeko prozesua martxan zegoen” eta bajan dagoen langilearen lanpostua “ahal den azkarren betetzen ahalegindu gara”, Mankomunitateko buruaren arabera, eta bi udaletxetako alkateek “horren berri dute”.