Gaurko Garagardo festarekin eta biharko Azokarekin jarraituko du Mallabiko Kultur Hamabostaldiak

Maiatzaren 17an abiatu zen Mallabiko Kultur Hamabostaldiak hainbat proposamen iragarri ditu ekainaren 15era arte, tarteko gaur egingo den Garagardo festa edo biharko Nekazaritza eta Artisautza Azoka.

Gaurko egitaraua goizeko 10:00etan abiatuko den umeen mendi martxarekin hasiko da eta eguerdian bazkari autogestionatua egingo da frontoian. Arratsaldeko seietatik aurrera Garagardo festa egongo da probalekuan, herriko tabernariek prestatutako pintxoak salgai egongo direla. Umeek berriz, Kantu Kolore taldeak girotutako erromeriarekin gozatzeko aukera izango dute.

Biharko Nekazaritza eta Artisautza Azoka goizeko hamarretan irekiko da eta bertan herriko ekoizleek prestatutako salmenta postuak nabarmenduko dira. Frontoian kokatuko diren saltokietan bi ortuari, gozoki eta ogigilea, oilazko izter saltzailea eta behi eta ardi gaztagileak egongo dira.

Tio Teronen Semeak

Artisau postuak ere lekua izango dute eta bertaratzen diren bisitariek bertan jarritako sorkuntzak ikusteko eta erosteko aukera izango dute. Aurten, ehoziri-lanak, lorak, harginaren harri lanak, poltsa eta motxila egilea, bitxigilea, ehulea zein oihalak estanpatzen dituen eskulangileak egongo dira.

Eguerdian, Gazte Alai dantza taldearen ekitaldia eta Tio Teronen Semeak ikusgai jarriko duen ‘FreeshCool’ ikuskizuna eskainiko dira. Umeek gainera, puzgarriekin jolasteko aukera izango dute. Arratsaldean, briska txapelketa eta txokolatada egongo dira.

Kultur Hamabostaldiak jarraipena izango du hurrengo bariku arratsaldean egingo diren igel txapelketekin eta Dababarreneko gaztaien dastatzearekin. Asteburu horretan, 4 eta 14 urte bitarteko haurren olinpiadak egingo dira; zapatuan XVI. Biharko Izarrak pilota txapelketaren finala jokatuko da eta domekan gimnasia erritmiko erakustaldia egongo da.

Ekainaren 13an Bilbao Mendi Film Festivaleko pelikula onenen Menditour emanaldia egongo da Kontzejuzarrean eta hurrengo egunean, leku berean, bertsoak eta bakarrizketak uztartzen dituen ‘Erradikalak gara’ antzezlana emango da.

Aurtengo egitaraua ekainaren 15ean egingo den binakako Frontenis maratoiarekin osatuko da.