Etxebarriak eta Permachek kapitalismoaren ondorioak aztertuko dituzte Zornotzan

Sortu alderdi ezkertiar eta abertzaleak egindako ‘Kapitalismoaren ondorioak Euskal Herrian’ dokumentua izango da mintzagai Zornotzako Zelaieta Zentroan gaur, arratsaldeko 19.30etatik aurrera egingo den ekitaldian. Txitxarrak kultur elkarteak antolatutako ekitaldiko hizlariak Jone Etxebarria eta Joseba Permach izango dira.

Ezker abertzaleko alderdiak egindako txostenak hainbat arlo jorratzen ditu, “Nazioarteko egoerari begirada azkarra”tik hasita eta “Estatu Espainolaren krisi sakonak” ataletik jarraituta.

Ondoren “Euskal Herriari bestelako begirada ekonomiko eta soziala” ematen dio eta bertan “Krisia eta kapitalismoaren oldarraldi neoliberalaren ondorioak Euskal Herrian” aztertzen dira.

Atal horretan Euskal Herrian dagoen pobrezia eta bazterketa soziala eta hilabete amaierara iristeko zailtasunak dituztenen egoera aztertzeaz gain, langabezia, prekaritatea eta lanpostuen galerari buruzko hausnarketa egiten da. Kapitulu horretan industriaren eta maila teknologiko handiko industrien beherakada eta ikerkuntza eta garapenari dagokionez espainiar eredua dela erreferentzia azaltzen da.

Azkenengo atalak “Ondorio orokorrak” mahaigaineratzen ditu.