Durangoko Azokak epea ireki du guneetarako proposamenak aurkezteko

Durangoko Azokako antolatzaileek epea ireki dute azokako gune desberdinetan eskainiko den programazio oparorako proposamenak aurkezteko. Areto Nagusian, Ahotsenean, Kabi@n, Irudienean, Saguganbaran eta Szenatokian guneetan diziplina anitzeko aurkezpen-proposamenak egitea nahi duten sortzaile edo erakundeek, online bideratuko dituzte eskariak www.durangokoazoka.com helbidean.

Izena emateko derrigorrezkoa da webgunean erregistratzea eta erabiltzaileari dagozkion datuak betetzea. Gero, ‘aurkezpenak’ atalean bete behar da proposamen fitxa. Salbuespen modura, Ahotseneak bere webgunean ere aukera emango du proposamena bideratzeko.

Izena emateko epea gaur bertan ireki da eta urriaren 15a izango da apuntatzeko azken eguna. Proposamenak ontzat emango dira guneetako arduradunen baiezkoa jasotakoan.

‘Areto Nagusia, Hitzaren plazan’ deituriko gunean, zabalkunde lanak aurkezteaz gain, mahai-inguru, hitzaldi eta prentsaurrekoak izango dira eta ‘Ahotsenea, Sortzaileen plaza’, berriz, bi espaziotan banatuta dagoen literatura eta musika sortzaileen gunea da. Bi espaziotariko baten musikarien eta hizlarien solasaldiak eskainiko dira eta bestean, agertokian alegia, zuzeneko emanaldiak izango dira.

‘Kabi@, Digitalaren plaza’, azken hilabeteotako teknologia proiektuak aurkezteko gunea da; ‘Irudienea, Ikus-entzunezkoaren plaza’ espazioan film luze eta labur, dokumental edo spotak erakusteko aukera egongo da; ‘Saguganbara, Txiki eta Handien plaza’ familia osoari eskainitako espazioa da; ‘Szenatokia, Arte eszenikoen plaza’ euskarazko antzerkigintzaren eremua da eta ‘Azoka TB’ azokan gertatzen dena eskaintzeaz gain bideoklipez eta musikarien elkarrizketekin osatutako saioak igorriko ditu. ‘Plateruena, Kontzertuen plaza’, azkenik, bisitarien topalekua eta kontzertu handienak gunea bilakatuko da.