Dagigun! izango da Durangon 2016an ospatuko den Bizkaiko ikastolen jaiaren lema

Durangoko Kurutziaga eta Ibaizabal ikastolek 2016ko maiatzean antolatuko duten Ibilaldiaren lema Dagigun! izango da. Izenburu horrekin “ikasle euskaldun, prestu eta konpetenteak hezteko zereginean aurrera tinko jarraitzeko konpromisoa” azpimarratu dute Kurutziaga Ikastolako presidentea den Joseba Balerdik eta Ibaizabal Ikastolako presidentea den Kepa Zengotitabengoak.

Ikastolen jatorrizko proiektuak etorkizunean ere fruitu oparoak eman ditzan, derrigorrezkoa da “denen arteko elkarlana” adierazi dute bi presidenteek. Horregatik beharrezkoa da “ikastolek arlo pedagogikoan izan duten aitzindaritzari” eustea hemendik aurrera ere.

Asmo horretan funtsezkoa da proiektuen finantziazioa eta horregatik Ibilaldian lortzen den dirua “Ibaizabal ikastolaren eraikin berria ordaindu ahal izateko eta Kurutziagan Haur Hezkuntzako eraikina berriztatzeko” erabiliko dela adierazi dute.

Jatorrizko kontzeptua

Datorren maiatzean Durangon ospatuko den Bizkaiko ikastolen jaiarekin “jatorrizko kontzeptura” itzuli nahi dute; hau da, “parte hartzaileek euskararekiko, ikastolen proiektuarekiko eta, batez ere, ikastolek Euskal Herriaren euskalduntze eta egituratze prozesuan egin duten lanarekiko konpromisoa erakusteko balio izango duen Ibilaldia” prestatu nahi dute.

Ia urte bete gelditzen bada Ibilaldia egunerako, antolatzaileek deia egin diete bai bi ikastoletako ikasle, ikasle-ohi, irakasle eta gurasoei, baita euskalgintzan ari diren gainerako eragileei ere prestaketa lanekin laguntzeko, “lan hau denen artean egin beharrekoa dela” azpimarratuz.

Dagoeneko salgai daude lema eta diseinu berritzailea erakusten duten 2016ko Ibilaldiko materialak, batez ere arropa. Ekainean zehar denda irekiko dute Barrenkale kalean eta berorren ordutegia, asteazkenetik ostiralera, 10.00etatik 13.30era eta 16.30etik 20.00ra izango dela. Larunbatetan berriz, goizen bakarrik irekiko da.

Antolatzaileek ehunka lagunen kolaborazioa izango dute material hauek Bizkaiko eta Euskal Herriko txoko guztietara eraman eta Ibilaldiaren mezua zabaltzeko.