Bonbardaketaren 75. urteurrena gogoratuko dute

Aurten Elorrioko bonbardaketaren 75. urteurrena betetzen da eta Udalak eta Gerediaga Elkarteak ekitaldiak antolatu dituzte elkarlanean. Gaur desehorzketen inguruko hitzaldi bat izango da, eta biharko ibilbide tematikoa antolatu dute Intxortaren magalera.

Jimi Jimenez hizlariak “Hildakoak hilobitik ateraz, duintausna berreskuratuz” hitzaldia emango du gaur, arratsaldeko 19.00etan Iturri Kultur Etxean. Deustuko Unibertsitateko Geografia eta Historiako lizentziatua da Jimenez, eta Auzitegi-arkeologiako espezializatua eta Gerra Zibileko hainbat desehorzketatan parte hartutakoa, baita artxiboko dokumentazioaren azterketan ere.

Biharko ekitadiak Intxorta 1937 kultur elkartearen eskutik hasiko dira, ibilbide tematikoarekin. “Gerra Zibila Euskal Herrian Intxortaren magalean” Elgetako plazan hasiko da goizeko 9.30etan, bertan dagoen Memoria Historikoaren Euskal Interpretazio Zentroan azalpen batzuk jaso ondoren, ibilbidea Intxortako frontearen kokagunerantz hasiko da.

Bisitaldi gidatua, maketa baten alde biak kokatzen eta gerraren kausa orokorrak azaltzen hasiko da, ondoren gerraren garapena eta garaia bizi izan zutenen testigantzak jasotzen dituen bideo bat proiektatuko da, Gerediaga Elkartetik azaldu dutenez.

Jarraian bost kilometroko ibilbidea hasiko da frontearen kokalekuan zehar, erakusketa iraunkorra bisitatuko dela, azkenik. Ikusgai izango dira, beraz, berreskuratutako lubakiak, parapetoak, babeslekuak, garaiko armak (fusil, obus, mortero, pistola, metrailatzaile…), eta garaiko egunkariak, besteak beste.

DURANGON. Elorrioko albisteak