Gabonetako parkean, tokirik ez amentzat

Seguru nago tokia soberan emongo
deuskuela ezkaratzean, eta inork ez gaituela
inondik desagerrarazoko etxeko lanak egin
behar doguzanean edo aitite eta amamen
kargua hartu behar danean…

Ateraldi bitxia gaurkoa, ez? Esango neuke
ez dala horrenbesterako Bizkaiko egunkari
batean lehengo batean irakurri nebana
irakurrita. Neure hitzakaz esanda, Gabonetako
Parkean, aspaldiko partez BEC erakustazokan
egiten dan horretan, egun batez ateak gabaz
edegiko ei dabez “aitei”
barraketan ibilteko aukerea emoteko.

Halako titularra irakurrita kolore guztiak
etorri jatazan aurpegira, eta goizerdiko
kafesnea eskuan ozen eta argi bota neban
“eta amak? Etxean geratu behar al
dogu?. Albokoak begirada “apur bat
okerra” bota eustan.

Gaur ez dot ezer esango gaztelania hutsez
idatzitako albiste batean   arraro egiten
jatala euskal hitz bat  egotea. Beno,
esan dot, ezin naz isilik geratu. Dana dala, gai
hori hurrengo baterako itziko dot…

Bai azpimarratu gura dot, gureta edo gure
barik, gehiegitan emakumeak
desagerrarazoteko edo iraintzeko erabilten dala
hizkuntza. Gureta edo gure barik, baina, baina
hor dagoz adibideak parra-parra. Konturatu
zarie pertsona bat iraintzeko beti ama aitatzen
dogula?  Eta, zelan aitatu, ganera!

Kasu honetan “los aitas” botaten dau
kazetariak lasai asko. Hizkuntza kontuak
aparte itzita, gaztelaniazko terminoa erabilita
be, seguru nago ”los padres”
erabiliko zala, hitz horrek amak eta aitak
hartzen dauzala pentsatuta.

Ba, EZ! Ez ditu hartzen. Familia
tradizionaletan be, ama eta aita dagoz, hau
da, padre eta madre. Eta etxean lapikokoari
eragiten, umeari eperdia garbitzen, etxerako
lanakaz laguntzen eta aititeri adurra garbitzen
aitak eta amak inplikatzeko aldarria egiten
badogu, eta aitatasun eta amatasun
arduratsuak eskatzen eta banaketa kasuetan
be, ahal dala, zaintza partekatuaren alde
egiten badogu, asko eskatzea al da albiste
batean ama eta aita aitatzea?

Eta, ez daigun ahaztu, aita bako familia
asko eta asko gagozala. Ikusi nahi ez arren,
asko eta asko dira bi emakumek sortutako
familiak (eta  bi gizonek osatuak), ama
bakarrak (eta aitak) eta geurean bezala, ama-
amama-umea hirukoteak osatutakoak.

Dana dala, gomendio modura esango
neuke holango saltsatan sartu baino lehen,
albistea idazteko hizkuntza hobetutxuago
aukeratzea izan eitekeala, euskereak ez
daualako kasu horretarako horrenbesteko
burukominik emoten. Gurasoak hitzagaz aita
eta ama guztiak hartzen dozuz

Karmele Aurtenetxe Elorriaga kazetaria da