Postala ala WhatsAppa?

Opor sasoia heldu da. Nora edo hara joango gara gutariko asko. Postalen bat bidaliko diogu norbaiti? Ala zaharkitua geratu da ohitura hori?  WhatsAppa hobeto? Mezu idatzia ala ahotsezko bat? Ala Skype bidez komunikatu gara? Biderik azkarrena eta kitto.

Abiadura itzelean bizi gara. Dena arin egin beharrak itoko gaituen beldur izaten naiz batzuetan. Teknologia berriek sortzen duten arrakala digitalak berriz ikara eragiten dit lantzean behin. Izan ere, guretzat egunerokoak diren baliabideak ez dira denengana heltzen. WhatsAppa edo Skype zer den ez dakitenek eskertu egiten dute oraindik postala jasotzea, bai kanpora goazenean bidalitakoa, bai gabonetakoa. Ala ez? Neuk ere gustura jasotzen ditut oraindik eskuz idatzitako postalak zein gutunak.

Dena den, eskuz idaztea desagertuko ote den irakurri dut oraintsu. Aldeko eta kontrako ahotsak hasi gara entzuten. Tabletean ikasiko omen dute haurrek idazten zenbait lekutan. Finlandian hasi dira bide hau jorratzen. Beraz, agian hurrengo belaunaldietakoek ez dute eskuz idazten ikasiko? Eta nork idatziko dizkio postalak amamari? Beharbada, egunero begiratuko du amamak bere buzoitxoa ea iloba edo bilobaren batek idatzi dion, ea etxekoak dauden leku zoragarriko postala heltzen zaion. Eta?

Alde batetik pena sentitzen dut, bestetik berriz, konturatzen naiz, neuk ere gutxitan idazten dudala eskuz. Noiz bidali nuen azken postala oporretatik? Edo gabonetan?  Noiz bota nuen azkenengoz tarjeta bat mendiko buzoira?

Zelan edo halan idatziko dugu norbaitek irakurriko duen esperantzan. Agian, aurten ere, gogoratuko gara postala jasotzea gustuko duten etxekoez edo lagunez.

Opor egun onak izan lagunok. Irailera arte.

Marisa Barrena psikopedagogoa da