Durangoko jaietako
gazi-gozoak

Astegoien luze honetan, eguraldia lagun, jaiez gozatzeko hainbat aukera izan ditugu Durangon. Anitza izan da programa; musika, dantza, ume jolas, gastronomia, astronomia… zer ez dugu eduki?

Erreibindikazioak ere izan du bere tartea: gogoan izan ditugu etxetik urrun dauden presoak eta atoan etxeratzea eskatu dugu. Errefuxituez ere ez gara ahaztu. Errefuxitu askok bizi duten egoera irudi bidez erakutsi dugu.

Beste askotan lez, manifestazioak ere egin ditugu. Jendarte honetan ditugun gizaki matxista toxikoek eragindako indarkeria gaitzetsi dugu. Dakigula bi eraso matxista gertatu dira jaietan. Emakume erasotuek salaketarik jarri ez duten arren, iturri fidagarrietatik jaso dugu erasoon berri. Nahiz eta neurriak hartu zaila suertatzen da eraso matxistak  ekiditea. Ea datorren asteburuan eta aurrerantzean ere matxistek tregua ematen diguten.

Aipatutakoaz gain, badago jai giroan murgildurik egon naizenean begietan min egin didan beste zerbait, hain zuzen txosnagunearen inguruko portalak eta komertzioak babesteko jarri dituzten egurrezko xaflak. Ez dakit zertzat hartzen ditugun txosna erabiltzaileak. Bandaloak ote dira ba? Imaginatzen duzue jaigune guztia xaflaz babesturik? Edo Bilboko txostegune inguru guztia xaflaz beterik?

Egia esan, neurriz kanpoko iruditzen zait herriari itxura hori ematea. Neurriz kanpokoa hainbeste mila euro horretan xahutzea. (30.000,- euro entzun dut) eta gainera xaflok arriskua ere sortzen dutela jakin dugu. Emakume bati xafla gainera erori omen zaio, ezta?

Halere, jaiok oraingoz gozotik gehiago izan dute, gazitik baino. Eta…datorren astegoina geratzen zaigu ondio. Luzeak dira gure jaiak gero! Luzeegiak agian?

Bide batez, jendarte anitz hau kontuan hartuz, zer deritzozue, santuak bakean utziz, San Fausto jaiak barik, Durangoko jaiak esaten eta erabiltzen hasiko bagina?

Marisa Barrena psikopedagogoa da