Euskararen erabilera sustatzeko plan orokorra abian da

Euskararen Erabilera Sustatzeko Plan Orokorra herritarrei aurkeztuko die Abadiñoko udalak datorren barikuan, martxoak 5ean. Herrian euskararen erabilera normalizatzeko aurten egingo diren 34 ekimenen berri emango da bertan.

Lehen Euskara Planak 2010. urtean egingo diren 34 neurri zehatz jasotzen ditu, guztien helburua gizarteko hainbat esparrutan euskararen erabilera sustatzea. Hala nola, hezkuntzaren esparruan, lan-arloan, aisialdian, kirolean, kulturan, komunikabideetan, teknologia berrietan, euskalduntze-prozesuan, familia-transmisioan eta administrazioan.

Errota Kultur etxean izango da Lehen Euskara Planaren aurkezpena eta herritar guztiek parte hartu ahal izango dute. Bertan izango dira Abadiñoko udal-ordezkariak eta herriko talde eta elkarte asko izango dira, eta, horrez gain, Euskararen Aholku Batzordeko kideak ere egongo dira, horiek Udalarekin batera aritu baitira lanean plan hau prestatzeko.

Argi Abad, Euskara Arloko zinegotziak adierazi duenez,  “gizartea da euskararen erabilera sustatzeko ilusioa izan behar duena, eta, ahal duen neurrian, ahaleginak egin behar ditu gure hizkuntza gero eta nabarmenago ager dadin kaleetan”. Iazko abenduan onartu zuen udalbatzak plana.

Abadiñoko Udalak era honetako plan bat prestatzen duen lehen aldia da. Horretarako udalerriak dituen beharrizan bereziak hartu dira aintzat. Beharrizan horiek Abadiñoko euskararen egoerari buruzko diagnostikoa egin ondoren jaso dira.