Kapitala = Diru gosea = Pribatizazioa = Heriotza

Azken hilabeteetan, beste behin ere, argi gelditu da kapitalarentzat gure bizitzek duten balioa. Kapitalaren mesedetan gure bizitzak arriskuan jartzeko prest daude gobernuan daudenak. Gure lan osasuna, eta ingurukoena bermatzeko neurri nahikorik gabe lan egitera behartzen gaituzte kapitalaren interesak lehenesten dituztenak langileon osasunaren gainetik.

Eskualdeko lantoki desberdinetan bezala, gaur Durangaldean ditugun bi egoera beltz salatu eta gogora ekarri nahi izan ditugu laneko segurtasun eta osasunaren nazioarteko eguna den honetan;

82 egun pasa dira kapitalaren diru goseak eraginda, Zaldibarko Eitzaga auzoan zegoen zabortegia amildu eta bi langile lur azpian harrapatuta gelditu zirela. 82 egun betikoen interesengatik inguruko herritarron osasuna arrisku larrian jarri zela. 82 egun inork inolako ardurarik hartu gabe. 82 egun familia inolako notiziarik gabe. Hemendik gure babes eta indar guztia helarazi nahi diegu familiari, eta Alberto eta Joaquin behingoz aurkitu ditzatela aldarrikatu. Eta gertakari hau ezin dugula itzaltzen utzi ozen esan!

Erresidentzietan gertatzen ari den egoera latza ere salatu nahi dugu. COVID-ak argi utzi digu beste behin ere pribatizazioak, gutxi batzuen interesak eta gestio txarrak dakartzan ondorioak. Neurri eza, pribatizazioaren diru gosearen ondoriozko kudeaketa penagarria, langile falta… Guzti honek Ermuko Abeletxe nagusien egoitzan izugarrizko ondorio latzak ekarri ditu.

Bizi dugun egoera honen aurrean, kapitala bizitzen gainetik jarri da beste behin ere, eta heriotza asko ekarri ditu. Ekidin zitekeen egoera latz baten aurrean aurkitzen gara hasieratik neurriak eta arduradun politikoek hartu beharreko neurriak hartuko balituzke. Guk argi daukagu nor den guzti honen arduraduna. Zerbitzu publikoak urtez urte murrizten joan direnak hain zuzen ere. Zerbitzu publikoen pribatizazioa bultzatu eta dirua guztiaren gainetik jarri duten horiek. Kapitala bizitzaren gainetik jartzen duten horiek. Hemendik gure babes eta indar guztia Abeletxeko langile, nagusi eta familiarrei.

Bestalde, beste behin ere salatu beharra daukagu agintarien jarrera. Abeletxe erresidentzian dagoen egoera larria ekiditeko ez dituzte inolako bitartekorik ipini, baina ertzaintza eta Ermuko munizipalak bidaltzen dituzte, prebentzio neurriak hartuta, egoeraren salaketa eta babesa adierazteko elkarretaratzea debekatzera.

Argi izan dezatela, kaleak ez direla beraienak. Eta horrelako egoerak salatzera kalera aterako garela!!!

Lan osasuna bermatu bizitza defendatu!!!

LAB – ELA – ESK – STEILAS – ETXALDE – HIRU