Urtean hildako mendizaleak gogoratuko dituzte igandean Besaideko Oroitzapen Egunean

Iraileko hirugarren domekan ohikoa den Oroitzapen Eguna ospatuko da aurten ere Araba, Bizkaia eta Gipuzkoa elkartzen diren Besaide mendi tontorrean. Aurten txistularien eta txalapartarien doinuak eta mendian hildako euskal mendizaleen gogoeta mezaz gain Gurutze Gorriaren mendiko erreskate simulazioa egingo da.

Urtero inguruetako mendi talde batek antolatzen ditu eguneko ekitaldiak eta aurten eguneko egitaraua prestatzea Elorrioko Erdella Mendizale Taldeari egokitu zaio. Hori dela eta mendizaleen irteera Elorrioko plazan izango da goizeko 8.30ean, lehenik Memaia mendi tontorra igotzeko eta ondoren Besaidera heltzeko.

Txistulariak eta txalapartariak arituko dira goizeko 10.30etatik aurrera eta 11.00etan meza emango da. Jarraian Euskal Mendizale Federazioko presidentea den Joseba Ugalderen hitzaldia izango da eta 11.45ean mendiko erreskate simulazioa egingo dute Gurutze Gorriko kideek.

Besaide Dantza Taldeko dantzari eta txistulariek eguerdian eskainiko duten agerraldiarekin osatuko da aurtengo egitaraua.  Egun osoan janari eta edariz hornitutako txosna egongo da.

Besaide Eguna 1955. urtetik ospatzen den ekimena da eta honen helburua azken urtean mendi istripuetan hildako euskal mendizale guztiak omendu nahi ditu. Hori zela eta, monumentu bat altxatu zen bertan Mont Blanc mendian bi urte lehenago hildako bost euskal mendizaleen omenez. 1991n berriz, Yoshin Ogata artista japoniarrak egindako oroigarri berri bat inauguratu zen eta berau jatorrizkoarengandik metro batzuetara kokatu zen.