Funcor kooperatiba izango da hizpide ekainaren 4an Elorrion egingo den jardunaldian

Galdategia eta nekazal makinaria egiten zuen Funcor kooperatibaren inguruko jardunaldia antolatu du Andoni Esparza Gallastegi Gizarte Ekintzak, Elorrioko Udala, Laumunarrieta 1937 Memoria Elkartea eta Gerediaga Elkartearen laguntzarekin. Hitzaldi laburrekin osatuko den ekitaldia ekainaren 4an izango da Elorrioko Iturri Kultur Etxean.

Goizeko 10:30ean hasi eta 13:00etan amaituko den jardunaldia hitzaldi laburrez osatuko da. Ekitaldiko solaskideak Andoni Basabe, Julia Itoiz, Iñigo Agirre, Mikel Onandia, Rikardo Ajuria eta Jabier Lertxundi  izango dira.

Basabek, ‘Funcor. Zer gertatu zen?’ izango du hizpide; ‘Andoni Esparza y Funcor. La persona y su obra’ gaia landuko du Itoizek; ‘Funcor ikastetxea’ eta ´’Crédito al honor’ izango dira Agirreren mintzagaiak; ‘Elorrioko Eskola Esperimentala. Proiektu pedagogiko esperimental bat’ jorratuko du Onandiak; ‘Funcor: Txirrindularien lantegia’ izango da Ajuriak landuko duen gaia eta, azkenik, ‘Funcor eta Mondragon, bi eredu kooperatibo kontrajarriak’ azalduko ditu Lertxundik.

Solasaldien aurkezlea Andoni Aizpuru izango da eta jardunaldian parte hartzeko beharrezkoa da izena ematea gerediaga@gerediaga.eus e-postara idatzita edo 946818066 telefonora deituta.

Andoni Esparza sortzailea

Andoni Esparzak sorturako Funcor lantegia 1955etatik aurrera Euskal Herrian garatutako proiektu kooperatibisten inguruan jaio zen eta “atzerrira teknologia esportatu zuen estatu espainiarreko  lehenengo enpresa izan zen”, jardunaldia antolatu duten erakundeek azpimarratu dutenez.

Baina galdaketa eta nekazal makinaria arloetan izan zuen garrantziaz gain, Euskal Herriko lehenengo doako ikastola sortzeaz gain “ikasketak egiten laguntzeko bekak” ere eman zituen, garai  hartan “Suedian zuten moduko gizarte laguntza autogestionatu sistema” osatuz.

Kultur munduan ere presentzia nabarmena izan zuen eta Jorge Oteizaren asmoekin bat eginda, umeei zuzendutako artearen esperimentaziorako unibertsitatea abian jartzeko  saiakera egin zen Elorrion. Horrez gain, Nestor Basterretxea eta Fernando Larrukertek 1968an zuzendutakoFuncor kooperatibari ohiari buruzko jardunaldia egingo da Elorrion ekainaren 4an Ama Lur filmaren finantzazioan zeresana izan zuen; Elorrioko Arriola antzokiaren sorreran ere egin zuen ekarpena, eta 1961 eta 1962an lantegiarekin izen berarekin sortutako talde profesionala izan zen herrian.

Azpimarratzekoa da, bestetik, Funcor Laboral Kutxaren sorreran izan zela.

Kooperatibismo herrikoia

Enpresa familia baten hazi zen Andoni Esparza Gallastegi 2012ko ekainaren 1ean hil zen Iruñean. 23 urterekin sortu zuen Funcor eta bere bizitza osoan hainbat enpresa proiektu sustatu eta lagundu zituen, “beti kooperatibismoaren baloreak ardatz hartuta”.

“Esparzaren ideia kooperatibismo herrikoi bat egitea izan zen; herrian ardatza jarrita, teknologian eta ekonomian ezezik, kulturan eta hezkuntza ere indarrak jarri behar zirela sinistuta lan egin zuen”. 1970era arte iraun zuen Esparzaren proiektuak Elorrion. Funcorren diruen erabilera ez egokia leporatuta bere kontrako salaketa jarri zuten.