‘Asuelto’ eta ‘Encuentros’ lanak jarriko dituzte ikusgai Arriolan HURyCAN eta Denis Santacanak

HURyCAN eta Denis Santacanak sortutako ‘Asuelto’ eta ‘Encuentros’ koreografiak izango dira ikusgai gaur iluntzean Elorrioko Arriola Antzokian, Eusko Jaurlaritzako Kultura sailak antolatutako Dantza Garaikidearen Zirkuituaren XIV. edizioaren baitan. Bi koreografiekin osatutako ekitaldia iluntzeko 20:30ean hasiko da.

HURyCAN konpainiak eskainiko duen ‘Asuelto’ lanak Pau Cólera, Xavier Auquer Gomez, Arthur Bernard Bazin eta Candelaria Antelo biltzen ditu agertokian, lanaren egileak eta zuzendariak Bazin eta Antelo direla.

Oholtzan eskaintzen duten koreografia konpainiaren “lan prozesuaren azterketa da” eta bizitza organismotzat hartzen du mugimenduan dagoen gorpuztzat ulertzeko. “Gorputzak bera dena transmititu eta partekatzen du: magikoa eta ukigarria, kontzeptuala eta sentibera, ederra eta itsusia… Bizia” delako, taldekideen esanetan.

Lan honek mugimenduan jartzen ditu gorputzak modu magikoan, kontzeptualean eta sentsibilitate eta edertasun handiz. Ekitaldiko lau protagonistak talka egiten dute beraien artean, erakarri eta elkarrekin egin eta desegiten dira, umorea, indarkeria eta goxotasunaz baliatuta, beraien bizitzarekin apustua egingo balute bezala.

Ekitaldian ikusgai jarriko den bigarren sorkuntza, ‘Encuentros’ alegia, Denis Santacanak eta Victor Fernandezek dantzari eta zuzendariak eskainiko dute. Koreografia hau modu berezian landutako teknika anitzetan murgiltzen da, espazio-denbora eta antzerkigintza mugatu gabe eta aurreiritzi estilistiko gabe.

‘Encuentros’ekin dantza garaikidea eta flamenkoaren arteko fusioa modu berezian ikusteko aukera eskaintzen dute Santacanak eta Fernandezek.