Xara Tabernak eta Patxi Aranberri harakinak irabazi dituzte Buzkantza lehiaketak

Elorrioko Berrio-Otxoa kaleko bi negoziok irabazi dituzte asteburuan Buzkantza Jaiaren baitan antolatutako bi lehiaketak. Igandean ospatu zen odoloste egileen lehiaketa Patxi Aranberri harakinak irabazi zuen eta odolosteekin egindako pintxo lehiaketa berriz Xara Tabernak eskuratu zuen.

Aranbarrik zein Xara Tabernak lehiaketako bi atalak irabazi zituzten, epaimahai teknikoarena zein herritarrena alegia, batak eta besteak aldeko boto gehien jaso baitzituzten.

Odoloste lehiaketa igande goizean ospatu zen herriko elkarte gastronomikotan eta sukaldari profesionalekin osatutako epaimahaiak lau harakinen odolosteak aukeratu zituen finalerako. Lehiaketan bat etorri ziren herritarrek emandako botoak zein epaimahai profesionalenak eta irabazlea Patxi Aranberri izan zen.

Aranbarrik igandean lortutako saria lehiaketa honetan lortzen duen bigarrena da, 2013an herri-bozketako irabazlea izan baitzen. Urte hartan Abadiñoko Milikua lortu zuen epaimahai teknikoaren saria eta 2014an Durango Alberdik irabazi zuen epaimahaia teknikoren saria eta Aldekoa berriztarrak herri-bozketaren saria eskuratu zuen.

‘Txantxibiri’ pintxo irabazlea

Zazpi taberna aurkeztu ziren igande goizetik astearte eguerdirarte ospatutako odoloste pintxo lehiaketara. Herritarrek zein lehiaketara aurkeztutako pintxoak dastatzeko gerturatutako bisitariek eta epaimahai profesionalak aho batez aukeratu zuten irabazlea Xara tabernak aurkeztutako ‘Txantxibiri’ pintxo zela.

Xara tabernako Agurtzane Oleatxea sukaldariak lehiaketari neurria hartu diola berretsi du. Iaz ere bi sariak lortu zituen, epaimahai profesionalena eta herritarrena alegia, eta 2013an pintxo onenaren saria eman zioten profesionalek.

Taberna horrek ‘Txantxibiri’ izeneko pintxoa aurkeztu du orain arte burututako hiru edizioetan, baina urte bakoitzeko prestaketa desberdina izan da. Aurtengoak izozkia zirudien; odolosteaz eta aza kurruskariarekin egindako bola konpotaz beteriko barkillozko kukurutxo gainean aurkeztu zuten.

Tanger tabernak aurkeztutako pintxoak berriz aipamena lortu zuen, epaimahai teknikoak finalista aurkeztu zuelako.

Hiru egunetan egindako lehiaketak oso harrera izan zuen herritarren eta bisitarien artan eta herri-bozketarako emandakoa botoak 2.300 izan baziren “tabernetan saldutako pintxoak askoz be gehiago izan ziren”.