Udal merkatuak osasun bermeekin egitea eskatu du EHNEk

“Udalei merkatuak behar diren osasun bermeekin egitea ahalbideratzea” eskatu die EHNE-Euskal Herriko Nekazarien Elkartasunak, herritarrek erosteko eta baserritarrak lan egiteko dituzten eskubideak horrela uztartuko baitira. Baserritarren sindikatuak bere kezka adierazi nahi izan du plaza eta merkatu desberdinetan koronabirusak eragindako egoeragatik.

EHNEk kontuan hartu du egunotako osasun krisi egoera, baita Espainiar estatuko presidenteak Alerta Sanitarioa adierazi zuenenean ‘udal merkatuei’ buruz esandako ere. Pedro Sanchezek “gainontzeko elikadura guneen maila berean” jarri zituen azoka horiek, sindikatuaren arabera.

Eusko Jaurlaritzak Covid-19aren aurren ezarritako protokoloa ere norabide berdinetik doala gogoratu du sindikatuak. Iñigo Urkulluren gobernuak “elikagaien hornidura funtsezko jarduera da, eta garrantzitsua” dela dio, eta horregatik “bermatu egin behar da, bereziki osasun larrialdiko egoeran…”.

Ordizian eguaztenero egiten den merkatuan hartutako neurriak baliagarritzat eman ditu EHNEk. “Daukan bolumenagatik, eta osasun baldintza egokiak bermatze aldera ezinezkoa ikusten dugu bere horretan mantentzea”, adierazi dute.

Merkatua egin ahal izateko hainbat neurri hartu zituzten bai saltzaileek baita bezeroek ere. Saltzaile bakarra postu bakoitzeko; derrigorrezko eskularruen erabilera; 1,5 metroko segurtasun tartea mantentzea baserritarren artean; 1,5 metroko segurtasun tartea baserritar eta erosleen artean mantentzea; edo erosketa bakoitzetik bestera eskuak desinfektatu beharra, besteak beste, izan dira jarritako betebeharrak.

Normaltasuna Elorrion

Elorrion gaur goizean egin den ‘merkatutxoa’ri ere antzerako araudia ipini dio Udalak, “salmenta-postuen arteko tarte zabala” ezarri delako, bezeroen “sarbidea hesien bidez” kontrolatu delako, eta Udaltzaingoak bertatik-bertarako jarraipena egin diolako. Udalaren arabera “segurtasun neurri guztiak ondo beteta” egin da barikuetako azoka.

Elorrioko merkatuan bertako bizpahiru baserritar egoten dira eta kanpotik etorritako lauzpabost fruta saltzaile. Gaurkoan ez da egon oinetako, arropa eta bestelako produktuen saltzailerik.