Plateruenak aurrera egingo du Durangoko Udala eta 400 herritarren laguntzarekin

2014ko urrian Durangoko Plateruenak, kulturgune eta kultur egitasmo herritar horren bideragarritasuna ziurtatzeko asmoarekin hasitako ‘… eta urte askotarako!’ kanpainak, ezarritako helburua lortu du. Bost urtean 250.000 euro lortzeko helburua ia 400 herritarren eta Durangoko Udalarekin hitzartutako hitzarmenaren bidez lortuko dituzte.

Bankuei zor dizkien 250.000 euroak “duela hamar urte udal jabetzako eraikina zaharberritu eta Plateruena zabaltzeko egindako inbertsiotik” datoz. Eta zor horrek kolokan jartzen zuen egitasmoa osoaren jarraipena.

Ia 400 herritarrek egin dute bat ‘… eta urte askotarako!’ kanpainarekin eta bost urteko konpromiso ekonomikoa hartuta, zorraren erdia ordainduko dute. Beste erdia berriz, “Durangoko Udalarekin lortutako bost urteko hitzarmenari esker ordainduko dugu” Plateruenako arduradunen esanetan.

Helburua bete ondoren “pozik” daudela diote Plateruenaren etorkizuna ziurtatzea lortu dutelako eta “harro” sentitzen direla ezarritako helburua “durangarren babesarekin eta Durangoko Udalarekin elkarlanean” lortu dutelako. Gainera, “lortutako akordioagaz, ziklo garrantzitsu hau amaitu dugu”.

“Aldaketa sakona”

Azken urtetako krisiak “aldaketa sakona” egitera behartu ditu Plateruenako arduradunak, baita “kultura aldaketa” ere. Horren arrazoiak “egoera ekonomiko orokorraren eta ostalaritzaren beherakada; kultura bizitzeko bestelako moduen eskari soziala eta gure herriko egoera soziopolitiko normalizatuagoa” aurkitu dituzte.

Oinarrizko izaerari eta egitekoari eusteko asmoa asmoei “antolaketa sortzaile” eta “eragileak parte-hartzaile” bilakatzeko asmoa agertu dute; herritarren borondatezko lana bideratu eta, azkenik, Udal ordezkariekin elkarlana abiatuko dute “herri-ekimenaren helburu sozialak zerbitzu publikoarekin uztartuz”.