Eraso sexistarik ez

Iruñeko Hiritik dator notizia. Irundarrek argi daukate: Ez dute onartuko sexu erasorik.

Atzo, astelehen buruzurian, milaka lagunek Iruñeko Gaztelu plaza goraino bete zuten eraso sexistak gaitzesteko, bi egun lehenago Udaletxe aurrea bete zuten bezala. Elkartasunaren indarra argi geratu zen. Iruñeko Udalak, Peñetako partaideek eta hainbat eragilek bat egin zuten mugimendu feministaren aspaldiko aldarrikapenarekin: ERAZO SEXISTARIK EZ.

Nafarroako hiriburuko arduradun eta eragileen erabakia zein irmotasuna eredugarria iruditzen zait. Badakigu egun batetik bestera ez dela aldatuko matxisten jarrera. Dena den, neurriak hartzen hastea eta arazo hau feministena ez eze, gizarte eredu patriarkal osoarena dela konturatzen hastea urrats bat dela deritzot.

Aipatutakoaren haritik, jaietan ez ezik, gizartean merezi dugun espazioa, eguneroko jardueretan ere aldarrikatu behar dugu; etxean, prentsan, telebistan, kalean, tabernetan, eskolako patioetan…Izan ere, ez daukagu betaurrekoak moreak jantzi eta ingurua behatzea baino egunero partekatzen ditugun espazioetako orekarik eza ikusteko.

Horrela bada, beti, espazio guztietan, jaun eta jabe izaten ohituta dauden zenbaitzuri zaila egiten zaie berdintasuna eta parekidetasuna ulertzea, are zailagoa onartzea. Behin eta berriz “gure gorputzak gure territorioak” ozen esan dugun arren, ez dute entzun gura, antza.

Dena den, aldarrikatzen jardutea gogorra izan arren, ez gara isilduko harik eta, kaleak, jaiak, gauak eta askotariko espazioak gureak ere izan arte. Harik eta, erazo sexista gabe, askatasunean bizitzea lortu arte.

Marisa Barrena psikopedagogoa da