Atzera be? Bai, zoritxarrez

Gororatzen dozue egun berbera bizitzera
derrigortuta egoan gizonaren istorioa kontetan
eban pelikulea? Barriro nator emakumeak han
eta hemen erailten dabilzala esatera. Gu be
kondenauta ete gagoz ala?

Bihotza birrinduta daukat, apurtuta , eta
zatiak  loktiteagaz pegetan saiatzen
nazen arren, emakume bat eraila,
jipoitua,kolpetua izan dalako albistea
irakurtzean pegamentua urtu eta zatiak lurrera
jausten jataz barriro. Emakumea nazalako
pasetan ete jatan? Ez, pertsona nazalako.

Atzera be esan beharko dogu indarkeria
matxista gizartean nagusi dan harreman eredu
patriarkalean oinarritzen dala, indarkeria
emakumearen gutxiespen sistematiko eta
sistemikotik datorrela, emakumeari,
historikoki, balio eskasa emon izan jakolako.

Atzera be esan beharko dogu indarkeria
matxistaren kontrako borroka danon ardurakoa
dala, eta esparru guztietan landu behar dala,
hezkuntzan, justizian, osasunean, etxean,
kalean, ikastolan, jolastokian… euskereagaz
egin behar dan moduan.

Atzera be esan beharko dogu indarkeria
matxista sexuen arteko ezberdintasunetik
datorrela eta  parekidetasunera heltzeko,
hau da, emakume eta gizonak maila berean
egon daitezan, emakumeari lagundu behar
jakola… euskereari lagundu behar jakon modu
berean.

Atzera be urten beharko dogu nazkatuta
gagozala esatera

Atzera be…

Ez deutsat publizidaderik emongo
indarkeria matxista politika egiteko erabilten
dala esan dauan burubakoari. Nik ezinbesteko
joten dot indarkeria matxistaren gaia bizitzaren
esparru guzti-guztietan sartzea, erabagi eremu
guztietatik eragin behar da. Transbertsala da…
euskerea bezala.

Nire hitz honeek gazteengana heltzea
gurako neuke, gaurko mutilek emakumea
beren pare ikusi dagien eta parekidetasunaren
bildur izan ez daitezan eta gaurko neskek
beren emakumetasuna defendiduteko
 adorea izan dagien. Gaur, inoiz baino
gehiago, BELDUR BARIK urten behar
dogulako… euskereagaz bezala.

Bihotza birrinduta daukagu, bai, baina
atzera be altzauko gara nahikoa dala
oihukatzeko: NAHIKOA DA!!!

Karmele Aurtenetxe Elorriaga kazetaria da