Musika ekitaldi ugari eta Mikel Goñi pilotaria Elorrioko Erreka Kaleko jaietan izango dira

Azken urteetan jai-egutegian bere lekua hartu duten Erreka kaleko jaiak ospatuko dira asteburu honetan Elorrion. Kale horretako eta inguruetako hamabi taberna, EME-Elorrioko Merkatarien Elkartea eta Udalaren laguntzarekin antolatutako egitaraua gaur hasiko da ohiko pintxo-poteoarekin.

Prestatutako ekitaldi nagusiak bihartik aurrera burutuko dira eta egun horretarako kontzertua iragartzen dute herriko plazan gaueko 22.00etatik aurrera, agertokian Tribute to Eskorbuto eta The Mocker’s taldeak izango direla. Gaueko 23.00etan berriz beste kontzertu bat hasiko da Gaztetxean, kasu onetan A-Srama Live Asian Experience-rekin, eta saio hori amaitu ondore Dj-en saioa hasiko da.

Hilario Azkarate pilotalekuan jokatuko diren esku pilota partiduekin hasiko dira larunbateko ekitaldiak, arratsaldeko 18.00etan. Lehenengo norgehiagokan kadeteak jokatuko dute eta Paul eta Gontzal elorriarrak Markinako bikote baten kontra arituko dira. Ondoren, nagusien partidua jokatuko da eta protagonistak Azpiri eta Bikuñak  eta Mikel Goñi eta Garaizabalek osatutako bikoteak izango dira.

Arratsaldeko 18.30ean Luhartz taldeak eskainiko duen erromeria hasiko da plazan eta gaueko 23.00etan Anger, Bide Bakarra eta Baghdad taldeek eskainiko duten kontzertua hasiko da Gaztetxean. Arriola Antzokiko Ateneoan berriz, Korrupted eta Brothers taldeen kontzertua hasiko da gauerdiak eta saioa amaitu ondoren Dj-en ekitaldia hasiko da.

Igandeko ekitaldiak goizean irekiko den 3 R azokarekin hasiko dira eta eguerdian batukada talde bat ibiliko da erdigunea girotzen.