Larrea eskola publikoko patioa berritzeko lanak amaitu dira

Amorebieta-Etxanoko Udalak Larrea eskola publikoko patioaren instalazioak berritzeko lanak amitu ditu, hiru hilabeteko lanen ondoren. Ikastetxearen kanpoko espazioa berritzeko zein ingurune inklusiboagoa, naturalizatuagoa eta ikasleen garapen ludiko eta sortzailerako egokiagoa eskaintzeko 115.280 euro bideratu dira.

Jolastokian burututako lanen bidez “haur guztiek jarduera ludikoetan modu inklusiboan eta hezkidetzan parte hartu ahal izateko espazioa sortu da”. Izan ere, eraldaketa horrekin jolaserako eta mugimendurako aukerak handitzen dira, “kide izatearen sentimendua indartzeko, jarduera fisikoa sustatzeko eta ikasleen garapen emozionalari laguntzeko”, Udaleko arduradunen esanetan.

Material ekologikoak

Landare-azalera 332 m² handitzeaz gain “diseinu berriak eremu berde gehiago jasotzen ditu, azalera gogorrak arindu eta naturarekiko kontaktua hobetzeko”. Helburu horrekin, tamaina ertaineko zuhaitzak landatu dira trenbidetik gertu, itzala eskaintzen dutenak eta patioko mikroklima hobetzen dutenak.

Trebetasuna, oreka eta sormena sustatzen duten jolasak ere jarri dira patioan: eskailera eta txirristadun etxetxo bat, oreka-zutoinak, antzerki eta musikako txabola bat eta aulkiak dituen mahai bat nabarmentzen dira, irudimena eta interakzio soziala sustatzeko diseinatuak. Elementu horiek egiteko material ekologikoak eta ingurunea errespetatzen dutenak erabili dira.

Gainera, dauden ur-iturriak kanporako irteerarekin lotzen dituzten ibilbide irisgarriak sortu dira, jolaserako eta esploraziorako ingurune segurua eta estimulagarria sustatuz. Mahai eta aulkiez hornitutako espazioak, halaber, jolasteko, atsedenerako edota sozializatzeko aukera eskaintzen du.

Eskola-komunitatearen mesedetan egindako jarduera honen bitartez, Udalak hezkuntza-azpiegiturak eta gazteen ongizatea hobetzeko duen konpromisoa berretsi du.