Kudeaketa parte-hartzailean oinarrituko da Plateruena

‘Zilarberritzen’ gogoeta prozesu parte-hartzailea bukatu du Durangoko Plateruenak. Ondorio nagusien artean, aldaketa bi proposatu dituzte: kudeaketa eredua aldatzea eta eraikina egokitzea espazio berriak sortzeko. 

Seihileko gogoeta, Durangaldeko elkarte, sortzaile eta kulturzaleekin batera eraman da aurrera, EHUko Parte Hartuz ikertaldeak gidatuta.

Alde batetik, Plateruenaren kudeaketa eredua moldatzea beharrezkoa ikusten dute. Izan ere, eraldaketa honen gakoa “parte hartzea” integratzea izango da, funtzionamendu parte hartzaile bat sustatuz, eta boteraguneak aldatuz. Bestalde, sortzaileekiko laguntza harreman bat eduki beharko lukeela ikusi dute. Horretarako espazioa dibertsifikatzeko aukera ezberdinak baloratu eta martxan jarri behar dira.

Prozesu honetatik sei lerro estrategiko finkatzeko asmoa irten da. Alde batetik, proiektuaren etengabeko transmisioa “ezinbestekoa” ikusten dute arduradunek, Plateruenak “gertu eta bere sentitzeko”. Bestalde, Antzokiak elkargune papera hartu beharko lukeela uste dute, bai elkarte zein sortzaileen artean, eta emakume sortzaileen artean bereziki.

Musikaren monopolioa

Izan ere, ikuspegi feminista antzokiaren jarduera guztietan eta egunerokotasunean txertatzea beharrezkoa dela diote.
Bestalde, komunikazioa sakonagoa landu beharra ikusten dute, “gardentasunaren” garrantzia eta komunikazio pertsonalizatua egiteko beharra batez ere.

Musikak programazioa monopolizatzen duela aipatu dute ondorioen artean. Beraz, beste kultur diziplina batzuk barneratu behar direla diote.  Azkenik sortzaileentzako babes eta sustapen gunea izatea espero dute.