Juergarako gogoa piztu zuen Elorrioko Musika Eskolak

Garamendi’tar Agustin Musika Eskolako kideek larunbatean piztutako txupinazoak Elorrioko Ferixa Nausiko jaiak lehertu eta juerga, musika eta umore onaren ateak ireki zituzten. Lehenengo asteburuan herritar eta bisitari ugari izan da herriko kaleetan eta gehienen esanetan “iaz baino jende gehiago dabil aurten”.

Larunbata gabeko danborrada eta gainerako ekitaldien ondoren, ferixak hartu zituen igandeko lehenengo orduetako protagonismoa. Jende gutxi ibili bazen lehenengo orduetan eguerdirako jendez gainezka egon ziren bertan jarritako postuak.

Aldez aurretik iragarritako gazta lehiaketaz gain lehiaketa bat gehitu zioten azken orduan ferixaren antolatzaileek, postu onenarena alegia. Ardi gazta lehiaketan sei izan ziren partaideak eta epailearen arabera Idiazabalgo J. Aranburu Elkartearena izan zen onena. Postu ederrena berriz, Elorrioko Markos Arbulurena izan zen. Irabazle bakoitzak 125 euroko saria eskuratu zuen.

Igande arratsaldean umeen danborradak hartu zuen protagonismoa eta bertan izan zirenek argi erakutsi zuten erreleboa, oraingoz, badagoela.

Gazteek eta kuadrillek izango dute gaurko protagonismoa, goizean Aldatsekuan izango diren paellekin eta tortilla txapelketarekin eta arratsaldean Herriko plazan izango diren jokuekin.