Joseba Sarrionandia gogoratuz, sei orduko jendeaurreko irakurketa egingo dute

Herritarrak literaturara hurbiltzeko asmoarekin, ‘Sarri, hitzez eta ahotsez’ egitasmoa martxan jarri dute. Literaturzale eta Joseba Sarrionandia idazlearen lana gustuko duten hainbat lagunek antolatu dute ekimenak berbaldia, solasaldi dialogikoak eta sei orduko jendeaurreko irakurketa etengabekoa eskainiko ditu.

Antolatzaileek aurreratu dutenez, egitasmoa “modu lasai eta giro atseginean egin nahi genuke, parte hartzera animatzen garenok literaturaz goza dezagun”.

Lehenengo hitzordua datorren asteartean izango da, Durangoko Udal Bibliotekan. Bertan Joseba Sarrionandia idazlearen lanaren inguruan zenbait zertzelada berbaldia entzuteko aukera izango da, Joxemari Iturralderen eskutik.

Irakurri eta abestu

Hurrengo paradak, martxoaren 12an eta apiriralen 2an ospatuko dira, eta solasaldi dialogikoak antolatu dituzte. Bigarren hitzordu honen helburua “gure literaturako autoreak irakurtzeko beldurra kendu eta hauen lanak ulertzeko gai garela ikustea da”. Bertan edonork parte har dezake aldez aurretik izena emanez.

Azken hitzordua maiatzaren 9an izango da, eta sei bat orduko jendaurreko irakurketa etengabekoa egingo dute Plateruenean. Saio honetan, Sarriren hainbat liburutako pasarteak irakurri edo abestuko dituzte.

EGITARAUA:

– Hitzaldia: otsailaren 18an, 19.00etan. Durangoko Udal BIbliotekan.
– Solasaldi dialogikoa: martxoaren 12an, 19.00etan. Durangoko Udal Bibliotekan.
– Solasaldi dialogikoa: apirilaren 2an, 19.00etan. Durangoko Udal Bibliotekan.
– Jendaurreko irakurketa: maiatzaren 9an, 18.00-24.00. Plateruena Kafe Antzokian.

Solasaldi zein jendaurreko irakurketan izena emateko: sarri.joseba@gmail.com