Intxortako frontean hildako
44 elorriarrak gogoratu zituzten borrokaren 81. urteurrenean

Elorrioko Udalak eta inguruetako udal ordezkariek orain direla 81 urte Intxorta mendian hildako 231 gudari eta milizianoak, 44 elorriar tarteko, omendu zituzten atzo goizean egindako ekitaldiak. Bertan egon zen Idoia Buruaga Elorrioko alkateak, hildako herrikideak “ahanzturan ez galtzea” aldarrikatu zuen.

‘Intxortako Atea’ izeneko monumentuan egindako ekitaldian apirilaren 20an betetako Intxorta mendiko erresistentziaren 81. urteurrena gogoratu zuten. Gerra zibileko norgehiagoka horrek zazpi hilabete iraun zituen eta bertan 38 batailoi ezberdin aritu ziren Intxortako magalak defendatuz eta Francoren tropei aurre eginez.

Gertaera horiek gogoratu eta mendi hartako frontean hildakoak omendu asmoz, ekitaldi sorta antolatu zuten ‘Intxorta 1937’ Kultur Elkarteak eta Elgetako Udalak.

Hildako 44 elorriarren izen abizenak gogorarazteaz gain, etorkizunera begiratzeko lehenik iragana ezagutu behar dela nabarmendu zuen Buruagak bere agerraldian. “Berriro gertatu ez dadin, gure seme-alabek ezagutu dezatela gure aitita eta amamen istorioa”, adierazi zuen.

Horren harira, Elorrioko udalaren laguntzarekin sortu berri den ‘Laumunarrieta 1937’ elkarte memorialistaren lana goraipatu zuen, “Elorrion ere gertatutakoa ezagutarazteko tresna garrantzitsua delako”.