Herriko auzoak “bertan behera utzita” dituela Gobernu taldeak salatu du Elorrioko EAJ-PNVk

Elorrioko EAJ-PNVk “Elorrioko auzoen egoera” kritikatu du eta “hobera joan beharrean, nabarmen kaskartu da”, adierazi du Joseba Mujika taldeko bozeramaleak. Zinegotzi jeltzalearen esanetan, Elorrioko Udala “2016an behin ere ez da batzartu” Auzoen Kontseiluarekin eta Gobernu Taldeak “nabarmen murriztu ditu” nekazal guneentzat aurreikusitako politikak.

Auzoen Kontseilua 2010ean eratu zen nekazal guneen ordezkaritzarako organo gisa eta 2016a izan zen gobernu batzordeak urte betean “behin ere deitu ez duela”, Mujikaren esanetan. Auzoetako 15 alkate ordezkatuta dituen batzorde hau, gutxienez hiruhilekoan behin batzartzen zen aurreko urteetan eta horregatik EAJ-PNVrentzat ezinbestekoa da herriko auzoek “era aktiboan egituratzeko helburua duen organismoan parte hartzea”.

Talde jeltzaleak kaleratutako oharrean “auzo bakoitzeko diagnosia” egingo zuela eta “bakoitzeko lehentasunak identifikatu eta beharrizan guztiak betetzeko planteamendua” burutuko zuela gogoratzen diote auzoetako zinegotziari. EH Bilduren Gobernu taldea, gainera, bere konpromisoak bete beharrean “lehenago esandakotik aldendu dela” kritikatzen dute.

Murrizketak

Bozeramaile jeltzalearen arabera nekazal guneetara bideratutako politika publikoak, “gora egin edo hobetu beharrean, gero eta okerrago doaz eta gero eta murritzagoak dira udal aurrekontuetan aurreikusitako partidak”.

Horren erakusle jartzen du auzoetako bideak konpontzeko inbertsioak “nabarmen murriztu direla”; auzo berrietara ura eramateko azpiegituretarako partidak “ez direla egin”; auzoetako saneamendu arazoa “bertan behera utzita dagoela” edo auzo-taxi zerbitzuan planteatu nahi diren murrizketak “euro apur batzuk aurrezteko” egingo direla.

Aipatutako guztia kontuan hartu eta “behingoz herritargo osoaren alde lan egiten has dadila” eskatu dio EAJk Gobernu taldeari, eta bereziki “Elorrioko auzoetako herritarren interesak defendatzeari ekin diezaiola”.