Euskararen aldeko ‘501 baietz!’ kanpaina martxan da Zornotzan

Amorebieta-Etxanoko udaleko euskara zerbitzuak ‘501baietz!’ kanpaina jarriko du martxan euskararen erabilera sustatzeko. Astelehenean hasiko den ekimenaren helburua euskararen aldeko 500 konpromiso baino gehiago lortzea da eta berau gauzatzeko kanpainarekin bat egitea eskatuko zaie zornotzarrei.

Euskaraz jakin zein ez jakin, euskararekiko konpromisoa hartu nahi duenak idatziz adierazi ahalko du twitteren #501baietz hastag-a erabiliz edo e-posta bidez 501baietz@ametx.net helbide elektronikoan. Udalerrian ere, postontziak jarriko dira konpromisoak bertan uzteko.

500 konpromisotik gora lortzeko kanpaina urtea amaitu arte luzatuko da. Behin konpromiso guztiak jasota, partaideek erantzuna jasoko dute hartutako konpromisoa gogorarazteko.

Kanpainari bultzada emateko Zornotza Telebistan hainbat konpromisoren adibideak ikusi ahal izango dira, eta horiek oinarri hartuta herritarrek euren konpromisoak pentsatu beharko dute. Zornotzako hainbat kirolari eta profesional ezagunek ere parte hartuko dute kanpaina honetan euren konpromisoak azalduz.