Elorrioko EH Bilduk partaidetzara gonbidatzen du herri berri bat eraikitzeko

Elorrioko EH Bilduk maiatzean izango diren udal hauteskundeetarako  herri-programa “guztion artean” osatzera gonbidatzen du “herri borondatearen garaia delako”, Idoia Buruaga zinegotziak azpimarratu zuenez. Asmo horrek aurrera eramateko, besteak beste, bulego eta webgune berriak irekiko dituzte bihar.

Herritar ezkertiar eta abertzaleen ekarpenak jasotzeko asmoarekin sortutako ‘Zurekin hobeto’ ekimenaren helburua “Elorrio berri bat eraikitzea” da. Horretarako hamar arlo desberdin jorratzen dituen 150 galdetegi banatu dira sentsibilitate ezberdineko herritarren artean, “helburua ahalik eta elorriar gehienen iritziak aintzat hartzea baita”, Jon Ander Graciaren esanetan.

Galdetegietan landutako gaien arabera hainbat batzar egingo dira martxoaren 9tik 18ra bitartean eta herri-programaren lehen bertsioa osatuko dute.

‘Zurea da hitza’ deituriko herri-programaren bigarren bertsioa berriz, martxoaren 25ean landuko dute. Apirilean, ordurako ezagutzera emanda izango diren hautagaiak, talde, elkarte, koadrila, eragile eta norbanakoekin bilduko dira “maiatzetik aurrera eraikiko dugun Elorrio nolakoa izatea nahi  dugun eta nola eraikiko dugun” adosteko. Ondoren, herri-programaren hirugarren eta azken bertsioa eratuko dute.

Elkargune berriak

‘Zurekin hobeto’ ekimena gauzatzeko elkargune berriak sortu dituzte; fisikoa zein birtuala. Bata, Erreka kaleko 3. zenbakian dago kokatuta eta berau bihar, martxoak 6 arratsaldeko 19.30etan inauguratuko dute. Elkargunea “eztabaidarako, elkarlanean jarduteko, iritziak bateratzeko, esperientziak trukatzeko eta guztiok batera etorkizuneko herria eraikitzeko” izateaz gain “lanerako espazioa” ere izango da.

Bestalde, webgune berria ere abian jarri dute www.ehbilduelorrio.eus helbidean eta bertan “albisteak irakurtzeko aukeraz gain, herri-programaren urratsen kontakizuna” ere emango dute. Euskarri horren bidez Elorrioko EH Bilduko kideekin harremanetan jartzeko eta ekarpenak, iritziak, nahiak, egonezinak edo proiektuak helarazteko aukera izango du nahi duen orok. Webguneaz gain, “sare sozialetako profilak ere ireki ditugu, herritarrekin harremana sakontzeko” asmoz.