EH Bilduk bi urteko ikasleei
eskola garraioa eskaintzeko
eskatu dio Hezkuntza Sailari

EH Bilduko Rebeka Ubera legebiltzarkideak eta Lorea Muñoz, Endika Jaio eta Idoia Buruaga, Izurtza, Mañaria eta Elorrioko alkateak hurrenez hurren, eskola garraioan eginiko murrizketa kritikatu zuten atzo Eusko Legebiltzarrean. Agerraldian egoera horrek sortu dituen arazoak konpontzeko aurkeztutako ekimenen berri eman zuten.

EH Bilduk egindako agerraldian zein Durangon.com-era Bioletak bidalitako eskutitzean adierazten duenez, sare publikoko bi urteko ikasleei garraio zerbitzua kendu zaiela ikasturte honetan salatzen da. “Erabaki horrekin sekulako arazoak sortu dizkie hiriguneetatik kanpo eta baserrietan bizi diren familiei”, Uberak salatu zuenez.

Legebiltzarkidearen arabera, kasu hori jasan duten familietako “seme-alaben hezkuntza eskubidea kolokan geratu da, garraio zerbitzua kenduz gero, kontziliazioa ia ezinezkoa delako lana duten gurasoentzat. Lehendakariak dio kontziliaziorako laguntzak zabaldu behar direla, baina gero bere gobernuak kontrakoa egiten du: erraztasunak eman beharrean, oztopoak jarri”.

Emakumeen lan aukera

Hezkuntza Sailak eragindako arazoa bereziki larria da eta hala ohartarazi zuten Muñozek, Jaiok eta Buruagak. Elorrioko alkateak azaldu zuenez, udal arduradunek familia eta ikastetxeetako zuzendariekin jarri dira harremanetan “udalaren babes eta laguntza eskaintzeko, garraio zerbitzua bat-batean kentzeak kalte handia egin dielako familiei” eta egoera horrek “izugarri zailtzen duelako familia kontziliazioa edota emakumeen lan aukera”.

Sortu berri den egoera Hezkuntza Sailarekin batera aztertu eta garraio zerbitzua mantentzea eskatu du EH Bilduk. Lehenik eta behin, bi urteko ikasleei ere garraio zerbitzua eskaintzen segi dezala, eta bigarrenik, eskola garraioa arautzen duen dekretua berraztertu eta alda dezala behar diren neurriak aplikatzeko. Uberaren iritziz, “dekretu horrek, 2015ekoak, ez du balio, ez ditu ikastetxe eta familien beharrak asebetetzen eta murrizketak aplikatzeko tresna bilakatu da”.

Lakuak emandako azalpenak ere ez ditu ontzat eman Uberak: “Hezkuntza Sailak argudiatu du bi urteko ikasleen kasuan eskola garraioak ez dituela segurtasun neurriak betetzen. Hori da bere aitzakia, baina ez da sinesgarria. Batetik, segurtasun arloko araudia 2001ekoa delako. Orain arte ez da arazorik egon eta orain bat-batean araudia ez da betetzen? Eta bestetik, itunpeko ikastetxeetan bi urteko ikasleek garraio zerbitzua dutelako. Pribatuetan araudi berezia aplikatzen da ala? Publikoetan baino eskubide gehiago dituzte?”.