#mundiala

Aste honetan euskaren eguna izan dugu Euskadin, baina, zoritxarrez, udalerri guztietan ez dugu behar bezala egin. Durangon ondo ospatu dugu, denon artean egin ere. Alderdi politiko guztien artean adostutako adierazpen instituzionala prestatu dugu, eta harrotasunez ospatu dugu denon artean. Izan ere, euskara guztiona da, eta etorkizuneko ikuspegia izan behar dugu: ondo kontuan izan behar dugu jendarte eleaniztuna eta euskaldundua lortzeko ibili beharreko bidea. Etorkizunari begira egon behar dugu, eta gu horrelaxe gaude, etorriko diren belaunaldi berriei begira, gutako bakoitzak ereindakoa jasoko baitute haiek.

Hala ere, Euskadiko udalerri guztietan ez da hori egin. Gugandik urruti ez dauden udalerri batzuetan, arma politiko eta jaurtigai gisa erabili dute euskara, euskararen jabe bakarrak haiek direla uste dutelako. Baina euskarak, gainerako hizkuntzek bezala, ez du jaberik, erabiltzen duen hiztuna baizik ez du; eta, hizkuntza erabiltzeko, gurea dela sentitu behar dugu. Gurea, bai, baina ez “nirea zelako hil nuen” esaldiaren zentzuan, zentzu onean baizik.
 
Euskalduntzeko prozesuan bete-betean murgilduta daude, eta jendartea oso askotarikoa da, desberdintasun ugari baitago hizkuntza aldetik. Denok ibili behar dugu prozesu edo bide hori, baina argi izan behar dugu denok ez dugula zati berean bidea hasi, eta, beraz, denok ez dugula denbora berbera emango bidea ibiltzen.
 
Egin ditzagun urratsak aurrera. Durango adibide egokia da, guztiz eredugarria, denon artean bultzatu eta sustatu behar dugun Durangoko Azokarekin. Goza dezagun denok euskaraz eta gure kulturaz.

@idoiaagorria