Bizimodu jasangarriak aldarrikatzen dituen manifestua aurkeztuko du Elorrixak

Ekologistak Martxan, EHNE Bizkaia, Bizilur, Emaús Gizarte Fundazioa eta beste hainbat gizarte-mugimenduk, Garapenerako Gobernuz Kanpoko Elkarteak, sareak eta sindikatuek adostutako ‘Tipi-tapa bagoaz bizimodu jasangarrietarantz’ manifestuaren aurkezpena egingo da astelehenean Elorrioko Iturri Kultur Etxean. Elorrixa Ekologi Taldeak antolatutako ekimena arratsaldeko 19.00etan hasiko da.

Aurkeztuko den aldarrikapena bultzatzen duten talde eragileek, hamarkadak daramatzate “egungo bizimodua zalantzan jartzen eta planetako baliabideak agortzen dituen kontsumo neurrigabean aldaketak egin behar direla aldarrikatzen”.

Manifestua sinatzen duten erakundeek gizarte jasangarriak, justuak eta ekitatiboak eraikitzearen alde lan egiteko konpromisoa hartu dute, beharrezko ikusten baitute “bizitzaren eta planetaren zainketa erdigunean jartzen dituen beste eredu guztiz desberdin batera” aldatzea.

Aldarrikapenean azaldutako helburu guztiak, lau multzo nagusitan biltzen dituzte. Alde batetik, pertsonen zaintza bizitzaren jasangarritasunaren mugarri; bigarren ardatza, elikagai-subiranotasuna bilatzea da; hirugarren jomuga, desazkunde energetikoan jartzen dute, energia aurreztean eta modu justu eta demokratikoan birbanatzea bai ekoizpenean bai kontsumoan, hain zuzen, eta azkenik, ekonomia pertsonen, guztien ongizatearen eta bizitzaren jasangarritasunaren zerbitzura dagoen baliabidea izatea eskatzen dute.