Bertsotan ibiliko dira Gerediaga auzoko Salbadore jaietan

Abadiñoko Gerediaga Auzoa Salbadore jaietan murgilduko da gaurtik aurrera.  Hamabi Harri Auzo Elkarteak, Udaletxearen lagunatzarekin, prestatu duen egitarauak kontzertuak, lehiaketak, bertsolariak eta dantza saioak eskainiko ditu.

Donien Atxa jaso eta txapligu eta trikitixa doinuekin jaiei hasiera emango diete gaur, iluntzeko 20.00etan. Ondoren, Euskal Okelaz egindako gisaua banatuko da hurbilduko diren guztien artean. Gaueko 22.00etan, berriz, DJ Patry arituko da, aspaldiko soinuekin ‘karrozilentzako’ jaia eskainiz. Erromerian Ezten Giro taldea izango da, eta ondoren ‘Igo Bolumena’ saioarekin DJ Patry bueltatuko da.

Jai egitarauarekin bihar jarraituko dute arratsaldeko 18.30ean ospatuko den Asto Lasterketarekin. Hainbat sari banatuko dira: 80 euro, 60 euro eta 40 eurokoak. Ondoren, Tortilla Txapelketa burutuko da eta hainbat sari izango dira ere: 60 euro, 40 euro eta 20 eurokoak hain zuzen ere. Jai Batzordeak kalitatezko Euskal tomateaz prestaturiko entsalada eta ardoa jarriko ditu, plazan afari-merienda  egingo dutenen artean.

Bertsolariak eta Luhartz

Andoni Egaña, Jon Maia, Amets Arzallus eta Unai Iturriaga bertsolariek, Maite Berriozabal gaijartzailearekin, bertso saioa eskainiko dute 22.30ean. Ondoren Luhartz Taldea arituko da gaueko erromerian.

Jaiek igandean jarraituko dute Hamabi Harri dantzarien eta irlanderen dantza saioarekin. Goizean zehar makailau txapelketa pil pil erara burutuko da, eta arratsaldeko 17.00etan, berriz, Mus Txapelketa ospatuko dute. Ondoren, karabinaz tiro txapelketaren txanda izango da. Iluntzean Ansorregi, Larrañaga eta Lutxurdiorekin erromeria egongo da. Afari herrikoiaren ostean, erromeriak aurrera jarraituko du.