Atxondoko Udalak argazki lehiaketa antolatu du 2016ko egutegia egiteko

Hurrengo urteko egutegia egiteko asmoarekin, Atxondok Udalak argazki lehiaketa antolatu du lehenengo aldiz eta 2016ko udal egutegian agertuko diren irudi onenak saritu egingo ditu. 14 urtetik gorako edonorentzat irekita dagoen lehiaketa honetan parte hartzeko derrigorrezkoa da irudiak udaletxeko erregistroan entregatzea urriaren 30erako.

Partaideek hiru argazki entregatu beharko dituzte. Lehiaketako oinarrietan azaltzen denez, “bat paisaia izan beharko da, bestea, eraikina eta hirugarrena, pertsonak”. Gainera “argazki guztiak Atxondoko udalerrian eginda egon beharko dira”.

Hiru argazkiak  paperean aurkeztu behar dira, 30 x 20 zentimetroko formatu horizontalean eta koloreetakoak izan behar dira. Gainera, argazkiak hobeto erreproduzitzeko, irudiekin CD bat entregatu behar da, eta bertan agertzen diren irudiak 300 ppp-ko erresoluzioa izan behar dute. Irudiekin batera parte hartzaileek datuak dituen gutun-azal bat ere entregatu behar da.

Argazkiak originalak izan behar dira. Antolatzaileek gutxieneko ukituak bakarrik onartuko dituzte eta ezingo zaie efekturik gehitu.
Aurkeztutako argazki guztiekin erakusketa bat egingo da abenduaren 6an egongo den Atxondoko Nekazaritza eta Artisautza Azoka egunean eta irabazleen izenak eguerdiko 13.00etan emango ditu ezagutzera argazkilari profesionalez osatutako epaimahaiak.

Lehiaketa honetarako hiru sari prestatu dituzte. Lehena, hiru argazkien multzo onena aurkezten duenak, Tablet Samsung Galaxy Tab A eta 100 euro jasoko ditu; lehiaketako argazki onenaren egileak berriz Tablet Samsung Galaxy Tab A eta 50 euro jasoko ditu eta herriko argazkilaririk onenak (baldin eta aurreko bi sarietako bat ez badu herriko inork irabazten) Tablet Samsung Galaxy Tab A jasoko du.