Lokaletik AT! lehiaketaren irabazleak materialak erosteko 500 euroko saria jasoko du

Durangaldeko Amankomunazgoak eta Plateruena Kafe Antzokiak Durangaldeko musika talde gazteentzat sortutako ‘Lokaletik AT! lehiaketa antolatu dute. Talde gazteen lana ezagutarazteko 2012ko irailean sortutako ekimena, lehiaketa bilakatu dute aurten eta irabazleak materiala erosteko 500 euroko saria jasoko du.

Lehiaketa honetan parte hartzeko beharrezkoa da taldeko kideren batek 14 eta 18 urte bitartekoa izatea. Partaideek lehiaketarako beren beregi euskaraz sortutako kanta bat aurkeztu behar dute eta berorren egilea 14 eta 18 urte bitartekoa izan behar da.

Parte hartu nahi dutenek kanta, letra eta audioa bidali behar dute kultura@plateruena.net helbidera azaroaren 29a aurretik eta aurkeztutakoen izenak abenduaren 3an emango dira ezagutzera. Aukeratutako talde edo partaideak kontzertua eskainiko dute abenduaren 19an eta agerraldian lehiaketara aurkeztutako abestia eta beste kanturen bat edo batzuk joko dute, beti ere aukeratutako taldeen arabera.

Musika tresneria erosteko 500 euroko sari bakarra jasoko duen talde edo bakarlari irabazlea, aditu talde batekin osatutako epaimahaiak erabakiko du.

‘Lokaletik AT!’ ekimena talde hasi berriei jendearen aurrean aurkezteko aukera emateko asmoarekin sortu zen. Gainera “zuzeneko agerraldiak zelan prestatu eta raiderrak, soinu frogak eta gainontzeko eginbehar guztiak” nola egin behar dituzten ikasteko ere antolatu zen, Platerauenako kultur ekoizlea eta zuzenekoen arduraduna den Goiaz Pelaezen esanetan.

Durangaldeko taldeak

Aurreko edizioetan Durangaldeko taldeak ez ezik Lea-Artibai, Bilbo edo Gasteizko zenbait talde aurkeztu bazen ere, aurtengo lehiaketan Durangaldeko herrietako taldeak bakarrik aurkeztu ahal izango dira.

Hiru edizio burutu ondoren emandako urratsak Amankomunazgoaren partaidetza izango du eta horrelako ekimen baten parte hartzea “oso garrantzitsua da Amankomunazgoarentzat”, erakundeko presidentea den Aitor Lopezen esanetan. Horren arrazoiak, besteak beste, “euskarazko sorkuntza” bultzatzea eta “talde berriei euren lokaletatik irteteko aukera ematen dielako” aipatu zituen Lopezek.